26 August 2019

Kabar Aceh Untuk Dunia


Aceh Leubeh Peng(?)

...

  • portalsatu.com
  • 09 August 2019 22:00 WIB

T.A. Sakti di Balee Beuet Harah Jawiy Bahasa Aceh, di halaman rumahnya, Darussalam, Banda Aceh, Ahad, 7 April 2019. @Istimewa
T.A. Sakti di Balee Beuet Harah Jawiy Bahasa Aceh, di halaman rumahnya, Darussalam, Banda Aceh, Ahad, 7 April 2019. @Istimewa

Oleh: TA. Sakti, peminat sastra Aceh

Meunye leubeh peng tanda ka makmu
Barat ngon timu gob kheun ka kaya
Bak rumoh tangga meunan berlaku
Cit gohlom teuntu bak Nanggroe raya

Miseue di Aceh lon sareh laju
Ujong thon taeu  leubeh beulanja
Nyan APBA leubeh meutabu
Salah peulaku, kon tanda kaya!

Anggaran tiep thon teulat berlaku
Pakar nyang brisu lam surat kaba
Aceh taharap beurijang makmu
Antanyo laku nyang rugoe raya

Aceh  leubeh peng kon tanda makmu
Sabab deuh taeu rakyat dum papa
Rakyat lam nanggroe rame hansep bu
Utang meutabu udep seungsara

Jan teungoh meugoe meu-utang laju
Bak bloe minyeuk U meu-utang baja
Watee keumeukoh geubayeue teuntu
Tan tinggai sapeue geupuwoe cit pha

Meupalet-palet udep lam tunu
Hanasoe bantu tansoe pareksa
Anggota Dewan seungap hana su
Rakyat peureulu Pemilu saja!

Rumoh sikula barat ngen timu
Ka reuloh bangku bubong dum guha
Aleue ka beukah binteh ka lhu-lhu
Mija di guru hana seple pha

Peuelom tapeugah keu Dayah Teungku
Siumu-umu lam ala kada
Jareueng na dana keunan geutabu
‘Ohtoe Pemilu rame gob jakba

Lam gle Seulawah jalan u timu
Tiep seun ulon eu tampai ban ija
Reuloh sagoe jeh tampai sigeutu
Lhee buleuen umu rusak lom teuma

Meunye leubeh peng han meunan laku
Geubloe nyang baru dak miseue ija
Salang toe Banda meunan hai Teungku
Dan lagi itu Jalan Negara

Peue lom diudek tasek beuru-ru
Jeuoh apui hu teuntee han peuja
Jalan disinan wa ‘amma bakdu
Kadeuh droeneuh eu wahe pembaca

Aceh leubeh peng(?) rakyat that tunu
Jiwoe meu’u’u keudeh Jakarta
Adak han Aceh ka leubeh maju
Rakyat pih makmu peng lee meuputa

Dilee yoh diet peng bingkeng ngen tunu
Kheun ini-itu gob ade hana
Jinoe ‘ohle peng dalam Bank tudu
Allah Tuhanku Aceh nyan kada!

Alhamdulillah na koran bri su
Lagee nyan laku hanle meugisa
Mudah-mudahan bit jitem maju
Geusahkan laju anggaran teuka

Nyan DPRA meunan geumeusu
Takheun Alhamdu beuna ban kata
Rakyat ka carong hanpeuele rayu
Buet deungon meusu peuena meutuka(?)

Meunye tan saban su dengon laku
Rakyat han rindu geupileh gata
Di kamoe galak peumimpin jitu
Rakyat beumakmu nanggroe sijahtra!!![]

Catatan: Adak hansep peng sigeutu, nyang uroe raya ka dikeue mata. Uroe Aleuhad lusa ka Uroe Raya Haji. Selamat Hari Raya ‘Idul Adha 1440 H, Mohon Maaf Lahir dan Batin!

TA. Sakti dan Keluarga.

Editor: portalsatu.com

Berita Terkait


portalsatu.com © 2017 All Rights Reserved.