16 November 2018

Kabar Aceh Untuk Dunia


[BAHASA ACEH] Kulam Dayah Atawa Kulam Tgk Chik Di Paloh

...

  • THAYEB LOH ANGEN
  • 13 May 2018 18:23 WIB

Kulam Dayah atawa Kulam Tgk Chik Di Paloh, 2010. @THAYEB LOH ANGEN
Kulam Dayah atawa Kulam Tgk Chik Di Paloh, 2010. @THAYEB LOH ANGEN

NYOE keuh Kulam Tgk Chik Di Paloh (Teungku Chik Di Paloh) atawa Kulam Dayah. Aleh thon padum geukueh. Ka nibak nek tu kamoe geupeugah kulam nyan sit kana. Hana tingat kuh le padum luwah kulam nyoe, aleh 12 x 12 mete sit, dan lhok jih sangkira 5 atawa 7 mete.

Meunan keuh, ate kuwoe keunan kusipat teuman. Beyasa jih kuwoe atee uroe raya.

Kulam nyoe sabe na ie bah that pih musem khueng. Na mata ie bak sagoe rot timu-baroh. Mata ie nyan raya, suwah geutop ngon beulangong busoe ngat bek banje gampong. Meunyoe geupeuhah mata ie nyan, jipo ie meuc'ac'a u ateueh, lage jipo ie bak moto peumadam.

Bineh kulam nyoe geuturap ngon kareueng gunong (Mungken geucok dari Cot Panggoi - 2 batee u baroh kolam). Bak bineh jih na teuratak keulileng, teuratak dari krak mane atawa krak bak mane. Ka meureutoh thon mantong na kayee nyan. Krak bak mane neutu'oh kon? Klot itam jih. Lage leubo kanot.

Bagi kamoe awak Paloh Dayah ngon Paloh Meuriya, dan gampong laen, kulam dayah nakeuh teumpat manoe meurunoe meulangue.

Jadi, aneuk miet dua thon di Paloh Dayah ka jeut jimeulangoe. Inong agam saban. Suet baje suet siluweue, plum ju lam kulam. Lheuh nyan surak, khem raya raya su.

Meunyoe na awak Dayah (Paloh Dayah) jipeugah droe han jeut jimeulangue nyan bek neupateh. Haha.

Bagi aneuk Paloh Meuriya dan gampong laen, teuntee hanjet jijak meunyoe umu baro dua thon. Tapi, ukuran jih meunoe, asai ka jeut jiplueng dan weng sitangen, ka jijak u Kulam Dayah, jak meulangue.

 

Awak Pasantren Cot Pinto Karo atawa dayah (Pesantren) Modern Misbahul Ulum Paloh, kayem sit jijak meulangue bak kulam nyoe. Pue na izin guru jih atawa hana, bek neutanyong bak long, yang pasti na jigopgrop lam kulam nyan. Blum.

Paloh Dayah nakeuh nan gampong yang jinoe jituleh Mns Dayah (Meunasah Dayah) jinoe, Muara Satu, Lhokseumawe. Geuboh nan Meunasah Dayah sabab asai jih di hinan na Dayah Tgk Chik Di Paloh. Na meunasah saboh sit geupeugot hinan, keudeh u tunong kulam, sangkira 200 mete u tunong kulam. Kamoe meukhuen nyan Meunasah Dalam, karena u dalam bacut teumpat jih.

Bak bineh kulam na balee raya saboh, nyan kamoe kheun meunasah. Padahai nyan balee teumpat Tgk Chik Di Paloh seumubuet jameun. Raya balee nyan, memang nyan keuh dayah, teumpat geuseumubeuet. Nyan keuh yang kamoe khuen meunasah gampong, Mns Dayah, meupadum ploh thon u liket.

Jinoe balee raya (meunasah) nyan ka geureuloh seuramoe, tinggai teunhoh jih, jeut keu bale ubeuet. Dan nyang deuh di gamba nyoe nyan meunasah dari beuton, kon ata Tgk Chik Di Paloh peugot. Nyang ata Tgk Chik Di Paloh ka geureuloh, bit cuco darohaka so ureueng nyang yue reuloh nyan. Haha.

Meunyoe na neunak tes dum na teuga jipo ie nibak mata ie lam kulam nyoe, jeut jak ngon ngat kubuka beulangong nyan. Bek yo neuh hana so tham. Haha.[]

Banda Aceh, 13 Mei 2018.

Geutuleh le: Thayeb Loh Angen

Editor: THAYEB LOH ANGEN

Berita Terkait


portalsatu.com © 2017 All Rights Reserved.