26 June 2019

Kabar Aceh Untuk Dunia


Gaji keu Teungku

...

  • portalsatu.com
  • 05 June 2019 15:00 WIB

T.A. Sakti di Balee Beuet Harah Jawiy Bahasa Aceh, di halaman rumahnya, Darussalam, Banda Aceh, Ahad, 7 April 2019. @Istimewa
T.A. Sakti di Balee Beuet Harah Jawiy Bahasa Aceh, di halaman rumahnya, Darussalam, Banda Aceh, Ahad, 7 April 2019. @Istimewa

 

    Bacut takisah jinoe keu Teungku
    Hanasoe bantu nyang bri beulanja
    Padahai gobnyan buet lagee guru
    Umat geupayu jalan agama

    Watee merdeka jameun endatu
    Keu guru-guru gaji negara
    Teutapi tuwo gaji keu Teungku
    Leupah that lucu cit ade hana

    Meunan meuthon-thon hudep di Teungku
     Hana geubantu uleh negara
     Teutapi tugaih geupubuet laju
     Sabab di Teungku ikhlas lam dada

     Kadang aneukmiet na bantu-bantu
     Jiba boh labu peuneu-et poma
     Kadang dalam blang bantu teumabu
     Kadang bijeh u bantu jak pula

     Uroe ngon malam lam buet di Teungku
     Aneukmiet ‘a’u di rumoh tangga
     Peubeuet Aleuham nyang ladom Qulhu
     Hanatom tunu hate geumbira

     Hanya geuharap ubak Tuhanku
     Rakyat beumakmu udep sijahtra
     Akan hudep droe citna soe bantu
     Sabab Tuhanku maha kuasa
   
     Bak masa jinoe Aceh ka maju
      Leupah meusyuhu na UUPA
      Ngon otonomi meutabu-tabu
      Patot keu Teungku jinoe takira

      Ubak peumimpin geutanyoe bri su
      Neukira Teungku bekle seungsara
      Soe kira pruet droe ban uleue leumbu 
      Murka Tuhanku rijang binasa
      
      Adak kon gaji honor keu Teungku
      Lon kira laku beulanja cit na
      Neupri’ek pat laen bagi keu Teungku
      Asai seutuju cit kana cara

      Bak DPRA ulon peutrok su
      Bek carong rayu watee Pilkada
       Bek cangklak babah jan toe Pemilu
      Gaji keu Teungku tulong neukira

 
       Alhamdulillah bandum seutuju
       Ubak Tuhanku meunan ta do’a
       Peumimpin Aceh bekna nyang tunu
       Gaji keu Teungku cit hak ngon kada

       Astaghfirullah lana wa lahu
       Neubri Tuhanku Aceh beujaya
       Nanggroe beudame rakyat beumakmu
       Gaji keu Teungku beugeutem kira, Aminn!.[]

             T.A. Sakti
             Peminat sastra Aceh.

Editor: portalsatu.com

Berita Terkait


portalsatu.com © 2017 All Rights Reserved.