21 July 2019

Kabar Aceh Untuk Dunia


Harga Tubôh

...

  • portalsatu.com
  • 14 May 2019 22:00 WIB

 

Cicém kutilang nyum sang jipiyôh
Jineuk meutudôh di công bak manggéh
Salam'alaikum saleum sigo trôh
Toe deungön jiôh saban lôn sapéh

Dang-dang trôh sawô a-ô su dabôh
Jak tameuratôh wahé e waréh
Kadang chit kadang e hai bg Raôh
Ngön tameuratôh teufana seudéh

Jameun ka maju dumpeu na soe lhôh
Gunong beureutôh leumah peureuséh
Ta eu bak TV dum bayi halhôh
U dalam tong brôh keunan jipeuéh

Makeun aneuk cut macut ka awôh
Makeun nek jalôh manyak ban gadéh
Barô nyum mubèe watèe ka layôh
Kana gunong gôh nibak nyak putéh

Meumacam kasus jisensus jilhôh
Leuh nyan jipeutrôh bak layeue putéh
Ladôm bak koran keunan pih jibôh
Wangi deungön khôh meutindéh-tindéh

Rata peulosok ek-ok han teudôh
Lahé dum musôh dilèe meugaséh
Sayang bit sayang meulayang putôh
Binasa tubôh meuwab sijambéh

Hanjeut taingat khianat musôh
Ken ureung jiôh hai yang peuabéh
Kadang bu kuah taruwah tabôh
Saban tapajôh sama tempat éh

Hana cit kureung meupeung peung tubôh
Bak sagoe lampôh jasad jipeuéh
Jaroe ngön badan nyan tanlé utôh
Awai ka putôh jeut lapan boh gréh

Keupue lom raga oeh ka gop bungkôh
Soe tem jak urôh jigaséh-gaséh?
Bila tan nyawöng jinom lam tubôh
Ngön bangké puyôh sama peureuséh

Barô meuharga gata adoe böh
Tatkala sunggôh haté tapeugléh
Nimat Allah bri beurangkri halôh
Syukô beusunggôh bek piléh-piléh

Pubuet surôhan larang peujiôh
Haté beupatôh niet bek meulanggéh
Doa tapeujôk beutrôk tapeutrôh
Gaki bek meublôh nibak jalan "jéh"

Sunggôh percuma muka taurôh
Meumacam tabôh beudak peuputéh
Andaijih jiwa hana taseuntôh
Yang ka meubèe khôh hana tapeugléh

Meumada oeh noe rampoe lôn peutrôh
Mata kalayôh nibak lôn tuléh
Mameh atau phét baét lam bungkôh
Meuah nyak sungkôh bak ujông baréh.[]

Ditulis oleh Lisa Ulfa

Jeunieb, 13 Mei 2019

Editor: portalsatu.com

Berita Terkait


portalsatu.com © 2017 All Rights Reserved.