IDI – Waki Bupati Aceh Timu Teuku Zainal Abidin S.Pd.I, MH, uroë Seulanyan, 27 Oktober 2025 baroë, geujak bak lhèè boh gampong geupeurame acara molod Nabi Muhammad SAW.
Phon geujak u gampong Blang Poh Dua, Keucamata Julok. Sinan waki bupati ngon Muspika Julok ikot geujok beunantu keu aneuk yatim. Geupeugah lé waki bupati acara molod nakeueh saboh momentum peunténg lam peukara tacok tauladan ahklak Rasulullah SAW lam tameudép siuroë-uroë.
“Molod Nabi kon seremonial mantong, tapi momen peuingat bagi geutanyoë bandum keu ta tauladani siféut-siféut Rasulullah SAW, utama that lam peukara gaséh meugaséh, keujujuran, seureuta padoli keu uréueng laén ngon waréh lingka,” meunan geupeugah le Waki Bupati Teuku Zainal Abidin.
Lhéuh di Julok, geujak lom keudeh u Dayah Assasul Huda di gampong Meunasah Tunong, Keucamatan Pante Bidari. Geujak ngon Muspika Pante Bidari seureuta anggeta Dewan Perwakilan Rakyat Aceh (DPRA) Fraksi Peureute Aceh (F-PA), Muhammad Yusuf nyang seuréng geulakab seubagoë Pang Ucok
Trok keunan bak dayah nyan jisambot lé anéuek dayah ngon uréueng gampong sinan nyang teungoh geupeugot acara moled Nabi syit. Bak teumpat nyang waki bupati geupeusampoë hai peunténg lam jaga ukhuwah Islamiyah, seureuta peukong dayah-dayah di Aceh Timu seubagoë pusat peundidikan agama Islam.
Supot uroë geujak lom bak molod saboh teumpat teuk di Balèè Seuméubéut Darul Darul Mu’arrif, Gampong Teupin Raya, Kecamatan Julok. Geujak ngon Muspika Julok, Pang Ucok pih na syit geujak saban-saban ngon waki bupati. Sinan waki bupati geupeugah lom suai molod seubagoë momentum peukông iman, peukong taloë syedara seusama uréueng lam nanggroë.
“Jak tapeujéut acara molod Nabi nyoë seubagoë sarana intropeksi droë keudroë, tatingkatkan takwa keu Allah, tapeukông seumangat meuseuraya lam tabangun Aceh Timu nyang jroh,” meunan geuimbau le waki bupati.[]
Laporan: Maimunzir
Basa Acèh: Iskandar Norman
Èditor: Thayeb Lôh Angèn.
