ACEH TIMU – Bupati Aceh Timur, Iskandar Usman Al-Farlaky, S.H.I., M.Si., ngon Ketua TP-PKK Kabupaten Aceh Timur geujak kalon langsong kiban ka hi Tutue Gampong Naleung di Keucamatan Julok, Seulanyan, 7 Oktober 2025 / 15 Rabiul Akhir 144 H.
Tutue nyang panyang sidum 94 mete nyan jinoe ka reuloh han jeuet ngui le. Padahai, tutue nyan nakeuh raueh peunteng keu rakyat hinan. Aneuk miet sikula Gampong Naleung tiep uroe ule ili rot nan watee jak sikula, tutue nyan sit pusat ule ile rakyat di Kota Julok lam buet mita nafakah.
Bupati Al-Farlaky ka geukalon keudroe geuh hi tutue nyan. Jinoe, keu jeumeurang dari Gampong Naleung, rakyat suwah ngui jalo raket nyang geupeugot khusuh seubagoe alat jeumeurang darurat. Paleng han na lhee boh jalo nyang mubuet meugantoe-gantoe jak tulong rakyat jeumeurang tiep uroe Tuhan hinan.
Ban geukalon hi tutue ka lagee nyan, Bupati Al-Farlaky geupeutrang bahawa sigra geupeugot keulayi Tutue Naleung nyan. Bak watee nyan, Bupati sit ka geuba keunan Ulee Dinas PUPR Aceh Timur, Muslim, jak kalon langsong teumpat ngon geubileueng ju padum perureulee beulanja awai keu puga keulayi tutue Naleueng nyan.
“Geutanyoe tapuga keulayi tutue nyoe lam sigra ju. Ka ulon tandajaroe lakee beulanja puga tutue nyoe ukeue pemerintah pusat rot APBN. Tapi meunyoe hana bagah geupeurumeuen, maka tapeusiyap ju rot APBK Aceh Timu. Jinoe, geutanyoe teungoh tatimang-timang ngon Kadis PU, pakriban curak tutue nyang paling pah tepeugot,” kheun Bupati.
Bupati geupeugah, bahawa na dua peunileh curak nyang keunak geupuga. Curak phon, tutue gantung nyang pah keu ureueng jak ngon tapak ngon honda. Curak keudua tutue seumen-busoe lagee awai nyang jeuet ule ili kandran peuet ruda.
“Jinoe, geutanyoe meurancana curak awai ilee, kon tutue gantung. Geutanyoe peureuelee tutue nyan beukong ngon meuguna lam watee trep keu rakyat,” geupeunyata le Al-Farlaky.
Bupati geupeugah bahawa rancana puga tutue Naleung kon buet baro. Droenuehnyan ka geuyu peugot tutue nyan yoh mantong geuduek seubagoe anggota DPRA, tapi watee nyan po nanggroe di Aceh golom jeuet geupubuet. Jinoe, ngon na jabatan seubagoe Bupati, droenueh nyan peupasti heuet rakyat barollah beusampo ban hajat.
“Ulon tuwan ka trep sit meuteupue heuet rakyat Naleung. Dilee na tanyoe peutaba bak pemerintah, tapi golom jeut. Jinoe keuh watee tapeutrok hajat rakyat, beuteuka ban pinta beunyata,” kheun Bupati.
Bah pih jinoe pemerintah daerah teungoh na cubaan “efisiensi anggaran”, Bupati Al-Farlaky geupeuteuntee bahawa droenueh nyan teutap mustakah geupeurati wilayah Nyang jioh nibak banda, gampong bineh gle, gunong, ngon bineh pante.
“Cubaan bit “efisiensi anggaran”, tapi geutanyoe tamita curak peuneugot nyang paleng pah, ubuet beulanja tapi teutap got ngon kong tutue tanyoe. Mantong le tutue di wilayah bineh gle, gunong, bineh pante, di Aceh Timu nyang peureulee tapuga keulayi,” peunutoh Bupati.[]
Laporan: Maimunzir.