Ek Asee, Arakatee Meurupah Tumpok
Karya: Thayeb Loh Angen*
Nibak siuroe di nanggroe
Kawom Arakatee meurupah tumpok
ladom ka pungo ladom ka seudee
tamse himbee meuglueng glueng meuklok klok
Nyoe ata kah nyan ata kee
han kajok ata kee han kubi ata kah
Ata kah ata kee
Ata kee pu pasai ata kah
Nyan kon ata yah kah
nyoe kon ata yah kee
pu pasai kah han bi keu kee
Tumpok nyoe ata kee
tumpok kee kon ata kah
han kajok ata kee
han kubi ata kah
Meunyoe na dikah
pu pasai hana dikee
meunyoe na dikee
hom keuh dikah
Ka pungo kah
bek ka puseudee kee
ka seudee kee
bek jilhap kah
Bek kapeupungo pungo droe keuh ngon kee
brat pungo kee ngon kah
Ata kah ata kee
ata kee pu pasai ata kah
dikee ka seudee
dikah ka pungo
Ureung pungo ngon ureung seudee
tan malee meurupah tumpok
keu nyang hak han jijok
jibagi tumpok sabe pungo sabe seudee, ek asee.
Thayeb Loh Angen,
Teluk Samawi (Lhokseumawe), 7 Agustus 2020.
*Budayawan.
