Leupah that ramphak bak ureueng mate
Jamei dum ile beungoh ngon sinja
Lam tujoh uroe riyoh bukonle
Cit hana pre-pre jamei dum teuka
Jeuoh deungon toe kuta deungon gle
Ngon seunang hate kunjong syeedara
Jak saweue rakan-wareh ban mate
Peuet ploh thon akhe meureumpok hana
Di ulontuwan dis’ah lam hate
Bit ureueng mate leupah mulia
Tanda bukeuti jan ureueng mate
Jamei dum ile meubura-bura
Ngon bungong jaroe pisang meutangke
Ruti meusile ladom ba saka
Tan nyang soh jaroe saweue si mate
Nyang na hi Toke geuba beulanja
Sayang syeedara tan geumakeuenle
Gobnyan ka mate geutinggai donya
Tan jeuet meureumpok ngon ureueng mate
Moe beukah hate meuteumeung hana
Adak geusaweue watee goh mate
Teuntee boh hate jeuet duek meucakra
Jeuet poh beurakah jeuet tameulike
“Pakat u Tangse jak pula lada!!!”
Jinoe keupeue lom, lhom beukah hate
Gobnyan ka mate tinggai meung nama
Makanan tame tan geupajohle
Ka gob peura-e keu ureueng lingka
Watee peuetploh thon panyang bukonle
Meusiblet hate teuingat hana
Dok didalam buet, juruet boh pade
Nyang toke-toke gabhuek keumira
Guru ngon Teungku laloe ngon tahle
Keu Cutma Bate soe ingat hana
Baro teukeujot ‘oh gobnyan mate
Teulah lam hate hanale guna
Sayang meulang-lang di Cutma Bate
Meuthon-thon sabe geupreh syeedara
Geupreh jisaweue le Sinyak Kade
Katreb u Tangse dijak seumuga
Nyan aneuk kumuen aneuk Lem Tahe
Yoh watee keuce sabe geujaga
Kayem geutingkue, geuayon ca-e
‘Oh duek di Tangse dijih ka lupa!!!
Alet ie mata weueh dalam hate
Hana gunale “ie mata buya!”
Aneuk cut-rayek peutron di Tangse
Meureumpok tanle dijih ngon Maha
Wahe kawom lon rakan boh hate
Kisah lam ca-e le ureueng rasa
Laloe hareukat peusapat rupe
Teuingat tanle akan syeedara
Baro teukeujot trok “surat mate”
Teuka lajule teulah lam dada
Silaturrahmi meuthon-thon tanle
Dawok dok sabe peusaho atra
Dum ureueng tuha di gampong di gle
Sayang bukonle soe saweue hana
Aneuk ngon cuco dalam dok sabe
Peue lom tapike keu ureueng lingka
Saweue-seumaweue jinoe hanale
Donya rab akhe nafsi-nafsiya
Bak duek teujunun sidroe Nek Bate
Kadang ngon Cupe geupeugah haba
Jan-jan ngon Mie-ong gobnyan meuca-e
Dumnan meuseuke ngon peugah haba
Nyang muda-teuga laloe meurabe
Soe ingat tanle keu ureueng tuha
Ajai pih sampoe umu ka sampe
Yohnyan Nek Bate woe ’alam baqa
“Innalillahi…” umum lajule
Bahwa Nek Bate geutinggai donya!
#Catatan : Nan ureueng ngon nan teumpat lam kisah nyoe kon kisah nyata, hanya mangat meusantok/meupakhok ca-e mantong!!!.
Kireman : T.A. Sakti, Banda Aceh
