Di dalam hudép hansép ngön harta
Hansép ngön rupa atauwa ilmèe
Hudép nyoe hansép meubukét cinta
Atau mahkota di ateuh ulèe
Geutanyoe insan bek ban ka kaya
Embông ngön riya tangui keu bajèe
Ureung tagaséh tapiléh marga
Ureung tacinta tapandang bulèe
Gaséh bek meuri benci bek beda
Beusama rata lam jeub-jeub watèe
Sesama islam tamselan rupa
Adoe deungön A lam saboh jurèe
Bek tameuabéh ngön waréh lingka
Gopnyan keuh syara wahé e kumbèe
Blah wie ngön uneun seung-seung silingka
Pasti na masa jiran tapeurlèe
Teuka siuroe neu ujoe cuba
Allah bri bala tubôh teuh lapèe
Wali ngön karông ken yang phôn teuka
Para tetangga yang plueng meurèe-rèe
Maka bek mudah babah serapa
Ngön wab sideupa ka tameulagèe
Haté bek tathôk lom bek brôk sangka
Hudép beumesra ngön jubah ilmèe
Jiran laksana busana gata
Pelindông raga peuneutôp malèe
Kala meunyum phông bek prôm lam kamba
Jak rhah le sigra mangat harôm bèe
Saléng meugaséh putéh ban saka
Saléng hareuga ban surôh gurèh
Ngön insya Allah ceudah lagoina
Dalam bahgia chit hana brèe-brèe
Di dalam hudép hansép ngön marga
Atauwa nama jeub rata jithèe
Hudép nyoe hansép ringget meujuta
Bila sijahtra hana tatumèe.[]
Ditulis Oleh : Lisa Ulfa
