MEKKAH – Gubernur Aceh H. Muzakir Manaf geu hadiri undangan khusus nibak investor Timu Teungoh nyang ka meusapat di Banda Makkah. Acara nyan geumulai ‘oh ban lheueh Muzakir Manaf geupeubuet ibadah umrah bak uroë Hamèh 15 Oktober 2025 / 23 Rabiul Akhe 1447 H.
Muzakir Manaf nyang kayém tadeungö geuhoi ngon nan Mualem, nibak watèe nyan geupeungon lé staf khusus Hubôngan Luwa Nanggroë H. Muhammad Fauzan Kamil ngon H. T. Irsyadi. Investor-investor nyan teuka dari Arab Saudi, Sudan, Kuwait, Qatar, ngon Uni Emirat Arab, dan mandumgeuh nyan di yup bandéra Sadeen Albait nyang kantô pusat jih na di Arab Saudi.
Lam acara nyan, Mualem meurumpök watèe nyang jroh that keu geupeusampoe bhah nyang meuhubông ngon peuluwueng investasi di Aceh. Lam pidato gobnyan nyang rab sijeum, Mualem geupeugah, rayek that geuteurimong gaséh ateueh undangan nibak investor Sadeen Albait. Mualem geupeugah bhah nyang leubeh keu prospek investasi lam bideueng keumeukueh (pertambangan), minyeuk bumoe, batèe bara, kueh meuh sampoe keu bijèh beusoe, geupeugah lé Fauzan.
Fauzan geusambông lom, Mualem geupeujeulaih cit kriban prospek peuluwueng meutani ngon meukeubôn atawa meulampôh di Aceh nyang keumah takeureujasama keu tapeubloe u luwa nanggroe (ekspor) aweueh-aweueh Aceh nyang that jigalak lé awak pasai Timu Teungoh, lagèe bungong lawang, pala, kulét manèh ngon la’én-la’én, geupeugah lé Keutua DPD Himpunan Kerukunan Tani Indonesia (HKTI).
Kon bhah nyan mantong, Mualem geupakat cit mandum peulabô (investor) keu geupeudong pabrék minyeuk u ngon pabrék eungkôt plôk, seureubôk kayèe (wood pellet), ngon pabrék biomassa di Aceh.
Laen nibak nyan lom DPD HKTI Aceh sabé-sabé sapue pakat meusinergi ngon meukolaborasi ngon Peumeurèntah Aceh nibak geupeumakmu ekonomi rakyat lam bideueng meutani, meulampôh ngon meula’ôt, geupeugah lé Fauzan geucok narit Gubernur Aceh.
Bak akhé presentasi, Mualem geupakat cit investor Sadeen Albait keu geu-investasi di Aceh deungon cara geupeudong maskapai Aceh Airlines.
Peue-peue nyang geuharap alhamdulillah meuhasé, hasé presentasi Mualem, geusambôt ngon göt lé pihak Sadeen Albait nyang that meuh’eutgeuh keu geu-investasi di Aceh deungon cara geupeunyata komitmen keusiapan nyang ka geupeutrang lam diskusi nyan, geupeugah lé Fauzan seubagoe staf khusus Gubernur Aceh bideueng Peundidikan ngon Hubôngan Luwa Nanggroë.
Hasé pertemuan peunténg nyan, pihak perusahaan Al-Zayer Arab Saudi langsông geupeunyata kesiapan keu meu-investasi lam bideueng airlines deungon geupeusiap lapan boh kapai keuphôn ubeut ngon rayek keu rute dalam nanggroë sampoe luwa nanggroë.
Laén nibak nyan, Sadeen Albait Group Arab Saudi pih geupeutrang lom bahwa akan geucok investasi lam bideuëng energi biomassa, meunan cit perusahaan Kuwait Al-Barrak nyang keumah geu-investasi lam bideueng peudong pabrék minyeuk u ngon pabrék eungkôt kalèng, geupeugah lé Fauzan.
Investor nyan geupeugah cit akan geujak kalon langsông u Aceh dalam jangka watèe nyang hana tréb lé keu geuimplementasi investasi nyan ateueh undangan Gubernur Aceh.
Lam acara nyan tim Sadeen Albait na cit geuba sajan gobnyan Dekan Fakultas Bahasa Arab Universitas Ummul Qura keu geukeureujasama ngon Peumeurèntah Aceh program beasiswa pendidikan aneuk-aneuk Aceh di Universitas Ummul Qura Makkah serta geukeureujasama ngon dayah-dayah, meunan cit ngon lembaga pendidikan Aceh keu program pendidikan bahasa Arab di Makkah Al-mukarramah.
Acara geumeuduek nyan geutôp deungon khanduri pajôh bu malam di villa keuluarga keurajeuen Arab Saudi di Jabal Khandamah nyang meukeu-keue langsông u Ka’bah, geupeugah lé Fauzan.[]
Rilis:
Editor Basa Aceh: M. Iqbal Hafidh.
