Alhamdulillah syuko keu Tuhan
Buleuen Ramadhan karab geubungka
Buleuen ‘ibadat umat Iseulam
Inong ngon agam leubeh takeuwa
Ta peubuet suroh peujeuoh larang
Buleuen Ramadhan le that seumpeuna
Peue lom di Aceh teungoh geutrapkan
Syari’at Islam beutrang meucahya
Teuingat tanyoe dilee saboh jan
Buleun Ramadhan ramphak lagoina
Meunasah peunoh uroe ngon malam
Tadaroih Qur’an tuha ngon muda
Peutamat daroih riyoh ngon garang
Khanduri sinan pajoh bu poh sa
Meulele ‘asa watee rab geubang
Ureueng meureuntang buka puasa
Ureueng peh Tambo A-O su kiyam
Dum meu’en Cabang jan uroe teuka
‘Udep Meunasah” uroe ngon malam
Jinoe lagee nyan hanpat tamita
Nibak watee nyoe ka meulaen ban
Meunasah suram buleuen puasa
Hanya dua-lhee ureueng beuet Qur’an
Teuraweh garang phon-phon puasa
Ureueng dum laloe dok baca Koran
Bak Warong Simpang duek peugah haba
Wajeb ta tinggai reusam lagee nyan
Syari’at Islam tapeu mulia
Alhamdulillah pujoe keu Rabby
Aceh beumeuri Nanggroe Syari’at
Walee goh bandum hukom Ilahy
Mantong geuci-ci geusipat-sipat
Talakee do’a nibak Ilahy
Makmu beu Neubri beujeuoh laknat
Peumimpin nanggroe miyub ngon tinggi
Bek sagai sunyi ingat keu rakyat
Peuelom di Aceh leubeh lom meuhi
Makmu ka meuri lawet prang seungab
Ka mudah rakyat mita raseuki
Get geumeutani atawa meukat
Patot tasyuko rahmat Tuhan bri
Hoho ta ili tanle meutat-tat
Ban liwat peuet thon Dame Helsinki
Geupeuringati rab rata teumpat
Wajeb tajaga dame abadi
Putra ngon putri bek peuget meungab
Syari’at Islam bek ta peubasi
Ngon buet korupsi lom buet maksiat
Nibak peumimpin lakee peurmisi
Beuade neubri Hukom Syari’at
Gasien ngon kaya bek bida sanksi
Nyang pangkat tinggi beuneujeuet seutrap!!![]
Kireman : T.A. Sakti
Banda Aceh
