Prang Ka Reuda
Karya: Thayeb Loh Angen
Penyair dari Sumatra
Nanggroë lheuh prang, ban damè
Jeut peuteuntèë nasib droë
sipakat saboh roë di Helsinki
Nanggroë guransang, tan lé
tapeulahé gurangsang muda
lam damè raya, siumu masa
Nibak saboh jan
Sultan Ali Mughayatsyah
geupeulét Portugéh peunjajah
nyang ka jirupah Sumatra, jikuasa Malaka.
Nanggroë tan lé prang
dalông damè lam tika
tabagi beurata keu rakyat barôllah
tabagi beuadé lam nanggroë
mangat leuh sudi po di uroë dudoë
Bah pih jinoë
geutanyoë tan lé saban kha ngòn indatu
bak tapeuhu h’euët peradaban
ròt cara udép lam dônya
meunumat tan lé tatukri mat
peuneuduëk tan lé tatupat peuduëk
Bah pi kon cangguëk di miyub bruëk
tapi na nyang mantong ba-ba bruëk
na nyang meuwòt lam bruëk ruhung
peureutè kamèng kap situëk
tapeuduëk lam jurèë
prang lam nanggroë ka reuda
tajaga até lam saba.
Banda Aceh, 16 Agustus 2023.
Thayeb Loh Angen
Penyair dari Sumatra.[]
Selamat dan terima kasih atas puisi yang luar biasa ini. Semoga Bang thayeb terus tegar menghadirkan martabat kesejarahan Aceh bagi kegemilangan masa depan bangsa tercinta.
Teurimong gaseh, Bang Ari J Pahlawi.