Oleh: T.A. Sakti
Alhamdulillah ta syuko rahmat
Buleuen keuramat ujong rab teuka
Mudah-mudahan bandum seulamat
Meuteumeung niekmat Lailaton Kada
Dalam Serambi trepka dimuat
Beurita hangat trok di Jakarta
Geuwoe bak Allah Hasballah Saad
Nyang kalheueh geumat Menteri Negara
Soe katrok ajai beukai ka tamat
Walau si saat cit tanggoeh hana
Tanyoe meudo’a talakee rahmat
Hasballah Saad beulam bahgia
Niet ulon kisah mudahan mangat
Nyang na mamfaat keu ureueng muda
Dum aneuk Aceh beukong seumangat
Hasballah Saad keu “guree” gata
Tacok keu cunto saboh meuneumat
Ngat kong seumangat udep lam donya
Jeuet lon kheun meunan bit na alamat
Hasballah Saad ureueng udep jra
Bah pih ‘oh rayek dum pangkat geumat
Tapi kon mangat yoh phon useuha
Lam meut’ie tu’ie hantom na mangat
Namun seumangat sebe meunyala
Seumangat juang pantang khianat
Udep lam himat tan putoih asa
Bak pihak gasien hansep ‘geuranat’
Bunda geuintat bak Tuke kaya
Yue bantu-bantu meukat bu mangat
Asai ek tamat bak jak Sikula
Bak Hasan Raden Warong that niekmat
Lam Meulo teumpat toe ngon Keumala
Bak Warong Bu nyan tantrep geumumat
Sabab meukarat bak jak Sikula
Warong Tuke Sen leubeh geuminat
Hasballah Saad pinah keureuja
Sinan Nyak Ballah trep that meukeumat
SMP tamat na lhee thon lama
Ban poh peuet malam buet laju geumat
Taguen ie leugat ku U seureuta
Sabab warong nyan kagob thee mangat
Bu Guri meuhat ngon bandeng hana
Bu Guri beungoh rame nyang minat
Hasballah Saad ku U tiep masa
Ie seu uem kaju sue U ka lumat
Santan kasep that siploh boh U na
Sinyak Hasballah jak manoe leugat
Lheueh nyan beurangkat ubak Sikula
Meunankeuh sabe tanpre tiep saat
Hasballah Saad jeumot lagoina
Guru geusayang sabab carong that
Tuke geuangkat lagee aneuknda
Tamat SMP lom SGB sambat
Mantong di teumpat Lam Meulo juga
Hanya lam sithon SGB tamat
Lheueh nyan diangkat guru Sikula
Jeuet Guru SD padum thon meuhat
Bak saboh teumpat nan Gampong Langga
Ngon gampong Lameue hana jeuoh that
Meunyo tasipat limong batee na
Sayang‘oh ujeuen jalan rhub sangat
Gari han liwat bhan tan meuputa
Nibak siuroe cit na lon lihatHasballah Saad payah jak ngon pha
Geusadeue Gari Keude Cut Amat
Langkah geuangkat u gampong Langga
Lon murid SD di Lameue teumpat
Glah nam rab tamat yohnyan Sikula
Teukeudirollah bak saboh saat
Tuhan bri rahmat keupada hamba
Dipeugot kursus keu guru leugat
KPG geusingkat nama sikula
Kursus lhee buleuen hana trep tamat
Hasballah Saad luloih lumboi sa
Tugas belajar laju meundapat
Kuliah meuhat keunoe u Banda
Trok Banda Aceh lanja terlibat
Ketua Senat bak FIP ngon sigra
Nibak HMI nyan pi that hibat
Laju meucrab-crab maju lagoina
Sekretaris DEMA bak akhe geumat
Lheueh nyan padum at tamong penjara
Teubiet totopan Dosen diangkat
Aktif giat that meumacam rupa
Ban Reformasi maju leupah brat
Meuteumeung pangkat meuganda-ganda
Anggouta KPU lom DPR Pusat
Hasballah Saad duek di Jakarta
Buet Presiden Gusdur teuma geuangkat
Menteri HAM geumat banphon baro na
Seb ‘ohnoe dilee ka lon peutamat
Jeuet cok ibarat hai aneuk muda!!!
Tapi sayang that kisah tanbak mat
Hasballah Saad riwayat hana
Otobiografi kalheueh droe surat
‘Oh gobnyan mangkat soe cetak hana!
Neubri Ya Allah meuribee rahmat
Hasballah Saad beulam Syuruga
Wahe rakan lon timu ngon barat
Mohon beule that neulakee do’a!
Amiinn!!![]
Keterangan:
1.
– SGB = Sekolah Guru Bantu
– KPG = Kursus Pendidikan Guru
– FIP = Fakultas Ilmu Pendidikan Unsyiah
– KPU = Komite Pemilihan Umum
– HAM = Hak Asasi Manusia
– DEMA = Dewan Mahasiswa
– Si Batee = 1 km
– Sue U = keureumeuh
– Gari = Geulitan angen
2. Pada, Sabtu, 27 Ramadhan 1432 sekitar jam 12.35 wib., cae di atas dilantunkan oleh Medya Hus di ACEHTV dengan penjelasan ringkas dari saya sendiri.
3. Hari Minggu, 28 Agustus 2011, cae ini dimuat dalam rubrik ‘Budaya’ Harian Serambi Indonesia, halaman 2.
4. Besoknya, Senin, 29 Puasa 1432 saat saya sekeluarga takziah (jak kunjong) ke rumah almarhum di Lameue; ketikan asli dan yang dimuat Serambi dari syair Aceh ini saya serahkan kepada Kak Dar, isteri almarhum.
Setelah berbincang dengan keluarga beliau, barulah saya tahu, bahwa tempat pertama Bapak Hasballah Saad bekerja di Warong Bu Hasan Raden, baru kemudian di Warong Bu Tuke Sen. Akibatnya, saya pun mengedit ulang cae ini.[]
•Budayawan Aceh
Bale Tambeh: Sabtu, 16 Puwasa 1441 atau 16 Ramadhan 1441 H bersamaan 9 Mei 2020, pukul 02.37 WIB.
