Guru
Jinoe PNS nyang rame guru
Nyang geukheun Cikgu di Malaysia
Keu nasib udep hanjeuet ceumuru
Sabab di Cikgu leubeh sijahtra
Lethat problema lam suai guru
Jinoe e Teungku lon pileh dua
Phon hai sijahtra keudua mutu
Meupalet iku atra nyan dua
Meungtan sijahtra payah get mutu
Sabab lam tunu guru mengaja
Untong na gaya haba u cong U
Adak han guru reubah lam tika
Kredit keu Honda kredit keu dapu
Allah Tuhanku botak keupala
Lheueh geucok gaji tanle sigeutu
Habeh geubayeue hutang nyangka ka
‘Ohtan pat tarek burekle laku
Jeuet agen buku guru sikula
Peng nibak murid geukutip laju
Alasan Teungku masok logika
Teuma nyang ladom di guru-guru
Kadang geume bu ubak sikula
Geutijik kueh meulapeh ngen bu
Geupeuduek laju bak kios tuha
Kahek pikeran pawang kanot bu
Urusan guru jeuet lumboi dua
Meunye lagee nyan pane na mutu
Hanpeue tapacu meutan sij
Guru DKI bit leupah gatu
Gaji geusibu ngen dana kesra
Dalam Serambi meunan geubri su
Tiep buleuen Teungku peng dua juta
Laen nibak nyan dalam hai mutu
Bakat ngon laku patot takira
Nibak tes tamong sikula guru
Bakat keu cekgu sareng beusigra
Miseue bak FKIP- Tarbiyah teuntu
Sareng Iniem u bek pura-pura
Meunye tan angleh na bakat guru
Disinan laju neuyue woe sigra
Sareng beurapat cok bakat guru
Bek rusak laju mutu sikula
Ureueng tan galak tagrak keu guru
Meuilah laku lagee meucuca
Trang peulajaran hantom na maju
Yue salen buku bak murid dumna
‘Oh habeh watee teubiet poguru
Pajan get mutu lagee nyan cara
Poprintah Aceh geutanyoe rayu
Martabat guru patot geubina
Peulom ngon dana jinoe meutabu
Sijahtra guru, mutu pih beuna!!!
T.A. Sakti
Peminat sastra Aceh
Catatan : Dana kesra DKI, Opini Serambi, Kamis, 16 Oktober 2008, hlm 22.
Pasantren Kilat
Assalamu’alaikom dum rakan sahbat
Pasantren Kilat tanyoe calitra
Jak beuet sikada lam watee singkat
Lam saat rehat buleuen Puasa
Kon di Pasantren geupileh teumpat
Meutapi teutap rumoh Sikula
Le peulajaran geubahaih Kitab
Geuconto teumpat Pasantren rupa
Buleuen Ramadhan di Aceh meuhat
Ka treb geupakat sikula hana
Ka geupeugisa ban dilee adat
Mulai sahbat watee Beulanda
Tujuan cit get leupah muslihat
Mangat ‘ibadat peunoh seunia
Puasa saheh Teuraweh leungkap
Hana meusabab gabhuek Sikula
Laen nibak nyan geuharap that-that
Murid beugeutrap ilmee agama
Jitem beuet Qur’an tamah lom Kitab
Sibuleuen meuhat lam pre sikula
Bak thon namplohan cunto riwayat
Mantong lon ingat di dalam dada
Bantoe Puasa kamoe ka siap
Ka geucok pakatle ureueng tuha
Kamoe aneukmiet ka neujak intat
Bak saboh teumpat Meunasah Jeumpa
Sinan na Teungku, Qari meugah that
Murid rame that sinan beulaja
Kamoe ban beungoh laju beurangkat
Saho meuhadap Meunasah Jeumpa
Sawak ija krong bak takue rapat
Ret blang meutrap-trap langkah meuhala
Trok ‘an puteh oek mantong teuingat
Keusan raya that buleuen Puasa
Kajeuet beuet Qari adak han hibat
Nyankeuh syeufa’at buleuen Puasa
Teutapi jinoe meubalek adat
Teumpat “seumeubeuet” leupah jareuengka
Sipadan ngon nyan hai rakan sahbat
Pasantren Kilat teupat ngon masa
Meujok bak Dayah sideh jeuoh that
Mumang ulee brat di ureueng tuha
Sikula nyang pre meung salah sasat
Aneukmiet batat jeuet keu ‘Dalupa”
Alhamdulillah leupah mustajab
Pasantren Kilat get that seumpeuna
Saboh saloran pilihan teupat
Han jadeh batat ngon sangga kana
Ubak Pemda NAD lon peu-et surat
Pasantren Kilat neu hiro beuna
Beuneu plot dana ngat meuho hadap
Bek meutap-uyab ban Datok tuha
Leubeh lom ramphak rancak seunihat
Pasantren Kilat meungkana dana
Meumacam lomba acara jeuet trap
Han rijang luwat aneuk sikula!!!
T.A. Sakti
25 Agustus 2009
Catatan : – Meunasah Jeumpa = di gampong Jeumpa, kecamatan Sakti, Pidie.
– Si Dalupa = seorang tokoh dalam hikayat Aceh sebagai sampah masyarakat.
– meutap-uyab = tidak berdaya
@Gaung Pesantren Kilat dalam bulan Ramadhan tahun 1440 H/2019 M, nyaris tak terdengar. Apakah masih berjalan atau sudah tersendat!!?.
