LANGSA – Waki Bupati Aceh Timu Teuku Zainal Abidin bak uroë Seulasa, 20 Oktober 2025 / 28 Rabiul Akhe 1447 H, geujak u Rumoh Rumoh Saket Umum Daerah (RSUD) Kota Langsa geujak saweue Saed Zakaria (51) nyang geulakap Botol, uréueng Sungai Raya, Aceh Timu nyang teungoh meuubat saket jantong sinan.
Saed Azhar nyan nakeuh sidroe mantan tantra GAM nyang jinoë jeut seubagoë Satgas Peureuté Aceh (PA) Aceh Timu. Awai lam masa prang Saed ceubeuh bila bansa lam prang, jinoë ka teu’eh lam tika meuseubab saket jantong.
Waki Bupati Teuku Zainal Abidin weuh that hate ban geukalon tuboh Saed Azhar ka pijuét that meuseubab peunyaket. Sigra geumat jaroë Saed nyang bak takalôn syit that leumöh ka.
“Droëneuh beuteuga, beuseumangat, Insya Allah saket nyoë na jalan keu puléh. Bek putôh asa, bek meurasa sdiroë lam peukara nyoë, kamoë na saja droëneuh, kamoë bantu kiban nyang mungken,” kheun Waki Bupati Teuku Zainal Abidin bak Saed Azhar.
Ban geudeungö lagèè nyan haba, teuharu keluarga Saed Azhar. Hana geusangka waki bupati trok geujak sawéue keunan geuba beunantu, geubi seumangat bagi uréueng saket sinan.
“Ulon turi lon tusoë soë droë neuh Bang Saed. Awai gigeh geumeujuang keu Aceh. jinoë tanyoë bandum na keuwajiban moral tabri dukungan keu Bang Saed nyang teungoh saket nyoë. Peumeurintah Aceh Timu hana meupaléng dari raykat, peulom lagèè Bang Saed nyang siroë peujuang,” geukhéuen lom le Waki Bupati Teuku Zainal Abidin.
Ban geudeungö lagèè nyan haba, Saed Azhar yang teungoh saket ngon su leumoh geuucap teurimong geunaseh bak waki bupati. “Ulon teuharu droë neuh neutem jak kalôn long nyang teungoh saket lagèè nyoë, peurati droëneuh keu ulon ngon keuluarga rayéuk that nilai beugi ulon,” khuen Saed Azhar bak waki bupati.
Seugolom geugisa, Waki Bupati Teuku Zainal Abidin geurapai doa bak geulinyuéng Saed Azhar, meutamah haru suasana lam ruangan nyan. Lhueh geumeudoa, waki bupati geulakèè idin tubiet dari sinan.[]
Laporan: Maimunzir
Basa Acèh: Iskandar Norman
Èditor: Thayeb Lôh Angèn.
