ACEH TIMU – Lam ate gogah meusabab nyum padoli, sambinoe Waki Bupati Aceh Timu, Ny. Bd. Erni Handayani T. Zainal Abidin, S.Keb, geusaweue Rumah Sakit Umum Daerah (RSUD) dr. Zubir Mahmud, Idi Timu, Jumuat, 10 Oktober 2025 / 19 Rabiul Akhe 1447 H.
Ngon langkah meusaneut leumoh leumbot ngon seunyom punoh gaseh, droeneueh nyan neumeututo ngon sidroe-droe ureueng meuubat nyang teungoh geumeujuang bak geulawan saket i rang ri bilek meuubat nyang na di RSUD nyan.
Seunaweue nyan kon keu peuleumah ri sagai, tapi keubit buet sibagoe dali bahwa na nyum padoli ngon ikheulah ate sidoe ma keu rakyat nyang teungoh geuuji le po teuh Allah. Lam tiep tuto geuh, Ny. Erni Handayani geumat jaroe ureueng meuubat hinan, geubri seumangat ngat bagah puleh dum ureueng nyan, beusaba, beuteuga bak geulawan peunyaket cubaban nyang geubi le po teuh Allah Taala.
“Ulon tuwan teupue, sit han mudah keu ureueng nyan nyang teungoh teu-eh leumoh meunan. Tapi ngon doa, saba, ngon beunantu nibak syara, kawom keurabeuek, sireuta ureueng peuubat di RSUD, insyaallah, Allah geubri keuh puleh,” kheun Ny. Erni ngon ie mata meuleng-leng.
Kon geubri seumangat sagai, droenueh nyan pih neubri beunantu ube-be na kuwasa keu bungong jaroe ngon dabeueh nyang peureule tiep uroe keu ureueng meuubat nyang geusaweue. Sikeuep tawadhuk ngon leumoh leumbot haba droeneueh ka ek peuteuka nyeum meusyara ngon leupie ate keu ureueng-ureueng nyang na di RSUD nyan.
Le ureueng meuubat ngon syara lingka geuh weueh galak ate, nyang hayeue lom na sit nyang ro ie mata bahgia geukalon peurati nyang geubi le sambinoe Waki Bupati nyan. Ureueng nyan geupeugah, han geusangka keu bit-bit ka geusaweue le sidroe ureueng nyang rumeh ie muka ngon got tuto ngon ikhlas geutunyeum nyeum saket ureueng nyan.
Seunaweue nyan geusambot le ureueng nyang uroh RSUD. Peureutee ureueng peuubat geubri seumangat jroh keu hai nyeum padoli ngon peurati nyang ka geubri le Ny. Erni Handayani keu ureueng meuubat hinan. Geupeusaheh bahwa, seunaweue sambinoe waki bupati nyan ka meupeuek seumangat nyang meuteuntee keu ureung nyan lam pubuet buet mustahak nyang mulia bak jaga rakyat.
Ngon buet keu rakyat lagee nyoe, Ny. Bd. Erni Handayani T. Zainal Abidin, S.Keb, geupeuleumah bahwa gaseh sayang ngon padoli nakeuh basa tiep manusia ban sigom donya nyang ek peupuleh si beurangkasoe siman.
Kon keuh badan sagai, tapi ate sit, ngon tawadhuk ate geuh, droeneuh nyan ka geubri conto keu dali bahwa neuduek ngon mah lam popeurintah han ek jihalang sidroe-droe ureueng teutap toe ngon rakyat barollah.[]
Laporan: Maimunzir.