ACEH TIMU – Meuribee droe anggeta Partai Aceh (PA) ngon Komite Peralihan Aceh (KPA) ban sigom nanggroe Aceh geumeusapat droe i Kabupaten Aceh Timu lam Duek Pakat Raya (Pertemuan Akbar) PA–KPA si-Aceh nyang geupeugot lhee uroe meutai-tai, Satu-Seulanyan, 11-13 Oktober 2025 / 19-21 Rabiul Akhe 1447 H..
Keurija raya nyoe jeuet keu hai peunteng bak peukong seueh ngon geupeutentee keulayi arah perjuangan politek Partai Aceh seubagoe partai lokal nyang lahe nibak rahim sijarah perjuangan rakyat Aceh.
Duek pakat raya nyoe geupeuphon ngon Bimbingan Teknis (Bimtek) keu anggeta DPRK dan DPRA Partai Aceh nyang geupubuet i Hotel Royal Idi. Bak ate nyan sit, Balee Serbaguna Idi jeut keu teumpat meurumpok-meurumbok khusuh Bupati ngon Wali Kota si-Aceh nibak Partai Aceh.
Seubagoe ahlul bait, Bupati Aceh Timu, Iskandar Usman Al-Farlaky, S.H.I., M.Si., geubi seunambot peunoh seumangat ngon nyum guransang keu amanah ka geuidin Aceh Timu seubagoe pusat buet raya Partai Aceh thon ini.
“Aceh Timu meusambot ngon peunoh takzem muliya ukeue babandum anggeta, peumipinan, ngon ureueng bako Partai Aceh ban sigom nanggroe Aceh. Duek pakat raya nyoe kon adat tiep thon sagai, tapi wate nyang mustahak tapeukong peuleumah ri Partai Aceh seubagoe partai lokal nyang sabe-sabe geugalak le rakyat,” geupeugah le Al- Farlaky.
Bupati Al- Farlaky geubi peunutoh, Partai Aceh lahe nibak buet raueh panyang perjuangan rakyat Aceh lheuh prang, sampoe an jinoe teutap jeuet keu teuneuga politek i bareh keue that i di Tanoh Rincong.
“Buet nyang deuh lahe ka takalon. Bak Pileg ngon Pilkada 2024, Partai Aceh mantong geupeuleumah i keue lam meuhaneng-haneng politek. Nyoekeuh dali bahwa ate rakyat Aceh mantong mirah, mantong geupateh keu perjuangan Partai Aceh,” geupeugah le Bupati.
Droeneuehnyan neupeupegah, duek pakat raya nyoe jeuet keu peuluweueng peusaboh droe keu meupeukong meusyara antar-kader ngon peukong meuhaba politek antara neuduek.
“Seubagoe ahlul bait, kamoe peupasti buet nyoe meuase ban hajat, beu na tinggai nyum meusaboh ate nyang kong antara geutanyoe babandum,” geupeugah le Bupati Al-Farlaky.
Duek pakat raya nyoe na geuteuka Wali Nanggroe Aceh, Tengku Malik Mahmud Al-Haytar, Peutuha Umum Partai Aceh, Muzakir Manaf (Mualem), Peutuha DPRA Aceh, lom babandum ureueng bako ngon peumimpin Partai Aceh nibak meubagoe wilayah.[]
Laporan: Maimunzir
