ACEH BESAR – Bunda PAUD Aceh Marlina Usman, keubit-bit geuteueng munafaat yoh seumaweue wajeb singkat geuh i Pulo Aceh. Kon geusaweue PAUD Negeri Pembina sagai, sambinoe nyang neuduek geuh seubagoe Peutuha TP PKK Aceh nyoe geutueng atee jak silaturrahmi bak meupadum droe ureueng tuha umu hinan ngon rakyat, Seulanyan, 13 Oktober 2025 / 21 Rabiul Akhe 1447 H.
Sidroe nibak nyan, Nek Aminah. Nek Aminah, nakeuh ureueng tuha umu nyang geunak wisuda lheuh ikot sikula Lansia. Keurija wisuda geunak pubuet bak November ukeue i AAC Dayan Dawood, lam tamon lingka Universitas Syiah Kuala.
“Seumangat Bu beh. Mangat jak sikula lansia, kon, le meureumpok ngon. Seulamat beh, eunteuk ate wisuda neuundang lon. Insya Allah lon jak u AAC Dayan Dawood,” geupeugah le Peutuha TP PKK Aceh, nyang droeneuh nyan sambinoe Gubernur Aceh, Muzakir Manaf, atau Mualem.
Lheuh nibak rumoh Nek Aminah, sambinoe nyang ureueng toe geuh geuhei Kak Na nyan, geujak u rumoh Sunardi ngon Haslinda. Lheuh nyan lom geujak u rumoh Ibnu Abbas ngon purumoh geuh Aisyah Arrasyid. Meunyeum bahgia sabab geusaweue le purumoh Gubernur Aceh, pasangan ureueng tuha umu nyoe geubri boh labu tanoh keu Kak Na.
“Rakyat hinoe mantong kong that geumat bak adat peumuliya jamee. Alhamdulillah, teurimong gaseh, uroe nyoe ulon na meurumpok bungong jaroe boh labu nibak Nek Aisyah,” geupeugah le Kak Na.
Lheueh nyan, Kak Na geusaweue rumoh Nursiah ngon Muhammad Ismi nyang teungoh teueh leumoh ateueh peuratah. Keuneulheueh, Kak Na geuseumaweue u rumoh Rahmat Akbar.
Rahmat Akbar geupeugah le ureueng peuubat ka meucureh saraf, meusabab nyan keuh pueh that bak jigrak badan, sabab bak hi rap teuganceng tuboh. Bak uroe keu siuroe, bandua ureueng chik jih, nyakni Abubakar ngon Nurlina nyang jaga papah ban Rahmat.
“Rahmat peureulee terapi, Bu, Kamoe suwah jak u ke Banda Aceh, tapi kamoe meutheuen han jeuet meujak lom sabab peurelee rumoh peuniyoh, terapi nyan sijumuat dua go. Meunyoe suwah jak woe, maka kamoe meutheuen bak beulanja, Bu. Leubeh got kamoe sibuleuen na di Banda Aceh, ngat leubeh pah meuubat sabab ngon na i Banda Aceh sibuleuen, ureueng peuubat jeuet geumat Rahmat leubeh jroh,” geupeugah le Abubakar.
Saraf Rahmat phon teupeh ate sikula SMP. Abubakar geupeugah, ate di Sekolah Dasar, Rahmat jeuet pubuet buet lagee beyasa, tan geunanggu sapue pih. Ban Jitamong SMP, hi peunyaket jih ka deuh ri, lehueh nyan lom, badan jih pih ka leumoh laju-laju.
Ban geudeungo nyang geupeugah le Abubakar, Peutuha TP PKK Aceh geumeujanji sigra geumita cara, leubeh mustahak keu hai rumoh peuniyoh keu teumpat eh Rahmat ngon kawom sira preh trok ate terapi.
“Insya Allah, geutanyoe mita teumpat nyang got keu rumoh peunyiyoh, ngat Rahmat jeuet leubeh khusyuk terapi, puleh, ngon jeuet pubuet buet lagee yoh sihat awai,” Kak Na geubi peunutoh.[]
Rawi keu Basa Aceh: Thayeb Loh Angen
Sumber : Humas Aceh
https://acehprov.go.id/berita/kategori/sosial-kemasyarakatan/kunker-ke-pulo-aceh-kak-na-semangati-lansia
