Bismillahi, lôn awali, puphôn rika
Bandum pujoe, milék sidroe, Rabb nyang Esa
Langët bumoe, dan geutanyoe, manusia
Allah peujeut, seu'iet ngön kleut, dum sigala
Ammaba'du, saboh buhu, meuakhe “a”
Bak nyoe nazam, hukôm islam, lôn ci rika
Tentang syarat, nyang peunténg that, tabeulaja
Serta rukôn, kiban hukôm, sah puasa
Syarat keuphôn, wahé kaôm, nyang mulia
Ureung islam, inöng agam, atau khunsa
Ihwal kafé, insan jahé, dalam dônyä
Keu awak nyan, tan surôhan, bak Rabbana
Ureung murtad, saho tempat, hana beda
Sa ngön kafé, han wajéb lé, berpuasa
Bila iman, hana sajan, dalam dada
Walau jroh buet, nyang jipubuet, tan meufahla
Nyang kedua, hai saudara, balegh lanja
Katrôh umu, meunan teungku, kheun ulama
Deuh bak adat, nyang ka meuhat, ban biasa
Haid ngoen lumpoe, nyang dua nyoe, leumah tanda
Teukeudi tan, nyang dua nyan, bak si hamba
Jeut bak umu, kalön laju, na padum ka
Akil balegh, chit hana hèk, bak takira
15 thôn, katrôh hukôm, ban sigala
Syarat keu lhèe, nyang ka teuntèe, sehat jiwa
Ureung pungo, dalam bhah nyoe, geupeu (???)
Hana hisap, dan neuanggap, hana dausa
Beuthat pih tan, le ureung nyan, geupuasa
Syarat keu peuet, le teungku beut, neupeunyata
Keusanggupan, jeub-jeub insan, bak puasa
Pham sanggôp nyoe, aduen adoe, na keuh dua
Keuphôn syar'i, leuh nyan insi, lumbôi dua
Meuphôm “Syar'i”, contoh lôn bri, ala kada
Haid ngoen Iddah, nyoe siulah, keu umpama
Disa'ah nyan, meuhalangan, kaom hawa
Hana wajéb, ateuh si zéd, berpuasa
Contoh “Insi”, wahé ummi, hana daya
Teungoh sakét, meuhajat jéb, ubat sigra
Leumöh badan, sanggôp pih han, tapuasa
Jeut geutanyoe, disaah nyoe, tinggai saja
Akan tapi, ri-beurangkri, payah qadza
Watèe laén, tapeuiréng, beuseugera
Nyang ka cacat, wajéb leugat, bayeue teuma
Meunan teungku, nyang geufardhu, lam agama
Ka seuleusoe, dalam bab nyoe, sang meumada
Jumlah syarat, nyang keuh empat, bagiannya
Jumlah rukôn, wahé kaôm, hanya dua
Kelengkapan, ulôn peutrang, laju sigra
Pertama niet, jaga beu dhiet, jeub kutika
Dalam haté, tapeulahé, beu sampeuna
Andai lupôt, tan meuseubôt, niet puasa
Teuka hän sah, meunan surah, kheun Fuqaha
Tentang watèe, Ka neubithèe, lé ulama
Dalam kitab, bandum lengkap, surah neuba
Mulai phôn, jeut niet langsông, oeh leuh buka
Sampoe imsak, oeh nan jarak, batasannya
Dilikot nyan, wahe taulan, nyang kedua
Tapeutheun droe, le geutanyoe, deuk dahaga
Serta laén, peu nyang mungkén, patôt jaga
Nafsu syahwat, perlèe that-that, tapeulara
Na 10 peu, nyang peubateue, “saum” gata
Beutaturi, tiep-tiep sisi, nyang meubisa
Karna amai, han selesai, ngôn sampeuna
Andai rukôn, na nyang puntông, takeurija
Namun bek lé, lôn peulahé, dalam rika
Takôt karang, han sipadan, deungön tema
Laén watèe, ulôn ritèe, meusideupa
Nyö na umu, khendak Rabbu, nyang Kuasa
Masya Allah, asoe madah, ban keureta
Kabrat panyang, ulôn tuan, lalèe raya
Ampôn neubri, andai rawi, meunyum gasa
Atau mungkén, han sijandréng, buhu rika
Shadaqallah, lôn tôp madah, ngön bahgia
Bak sidroe Po, ulôn puwoe, bandum doa
Moga-moga, Allah ridha, akan hamba
Dan nyoe riwat, meumanfa…[]
Kiriman TA Sakti: Karya Lisa Ulfa
