ACEH TIMU – Suasana peunoh khidmat teuka bak komplek Dayah Al Maimanah, Keudèe Duwa, Kecamatan Darul Ihsan, Acèh Timu, watèe Waki Bupati Acèh Timu, T. Zainal Abidin, S.Pd.I., M.H, geumeulangkah bak Acara Muzakarah Ulama Ban Saboh-Acèh, Uroe Aleuhad 19 Oktober 2025.
T. Zainal trôk teuka keunan kon keu seubagoe keu undangan sagai, tapi nyoe nakeuh saboh bukti gasehgeuh keu para ulama ngon komitmen gobnyan nibak geujaga nilai-nilai islam lam wilayah Aceh Timu.
Geuturi seubagoe ureuëng nyang meutuwah ngon santôn, T. Zainal Abidin deuh geusalam sidroe-sidroe para ulama nyang trôk teuka geupeumulia. Meunan cit lom, na nyang geumeuteukui sira geucôm jaroe para alim ulama, saboh sikap nyang geupeuleumah rasa horeumat ngon adab nyang ka teupula kong lam droe gobnyan.
“Ulama nakeuh panyot ummat. Meunyo hana ureuëng nyan, arah udép tanyoe akan seupôt, hana tatuho röt nyang beutoi keu Islam nyang samporeuna. Nyankeuh nyan, ulôn tuan langkah keunoe kon seubagoe peujabat, tapi seubagoe sidroe murid nyang meuh’eut beu rôh sabé lam kawan ureueng jak beuet, jak meurunoe nibak para Ulama tanyoe,” geukheun lé T. Zainal.
Acara Muzakarah Ulama Acèh nyoë na trôh teuka meupeuet ploh droe pimpinan Dayah, para Ulama Mansaboh-Acèh, ngon tokoh agama nibak meubagoe kabupaten/kota di Acèh. Diskusi nyang lhôk hinan geupeugah meubagoe isu keu-ummat, meutamah lom peran dayah nibak geupeukong generasi muda dari peungarôh Globalisasi ngon tantangan moral jameun jinoe.
Lam keuseumpatan nyan, T. Zainal Abidin na cit geupeusampoe apresiasi geuh ateueh kiprah Dayah Al Maimanah nyang sabé-sabé geupeulahé kader-kader ulama ngon Da’i muda nyang meu-akhlak ngon meu-èleumèe. Gobnyan geupeutrang bahwa Peumeurentah Kabupaten Acèh Timu sabé-sabé lam pakat geubri pue-pue nyang peureulèe ateueh peundidikan Dayah seubagoe pageue moral masyarakat.
“Peumeurèntah daèrah insya Allah akan sabé-sabé meusinergi deungon Dayah ngon Pesantren, Kareuna teumpat nyan keuh lahé generasi ukeue nyang kong iman ngon got akhlakgeuh, nyang akan geupimpin Acèh Timu deungon nilai-nilai Islam nyang seujati, saboh jan dudoe,” kheun gobnyan lom.
Para ulama nyang ka neulangkah bak acara nyan pih mandum geumeudô’a ngon restu keu Waki Bupati mangat sabe geubri keukuatan ngon beu-istiqamah lam geupeujak amanah. Ureuëng nyan mandum geupeutimang bahwa Waki Bupati di teungoh-teungoh para ulama kon keu nan sagai, tapi beu na beutôi beutôi lahé dari até nyang tulus ikhlaishh.
Nibak akhé acara, T. Zainal Abidin deuh geupeugah haba singkat nyang akrab deungon siplôh dua pimpinan Dayah, geudeungo masukan ngon aspirasi ureuëng nyan deungon peunoh peureuléè. Gobnyan na cit geupeusan mangat banmandum santri beujeuet sabé-sabé geujak meununtôt èleumèe deungon ikhlas, geujaga adab, ngon geumeuperan aktif lam geujaga marwah Islam di Acèh.
Suasana haru teurasa watèe gobnyan geuteubiet geutinggai lokasi. Na padum-padum droe santri geupeutoe geusalam gobnyan sira geumeuteukui horeumat. Rumèh that Waki Bupati ngon ucapan leumoh leumbôt gobnyan keu para santri geutinggai saboh ingatan nyang mèdalam di até mandum nyang teuka keunan.
Acara Muzakarah Ulama Acèh di Dayah Al Maimanah jeuet keu bukti nyata bahwa hubôngan antara ulama ngon umara di Acèh Timu teujalin rapat that lam bingkai saling meuhoreumat ngon meugaseh sabab Allah. Lam droe T. Zainal Abidin, masyarakat geukalön sosok pemimpin nyang kon mantong geu-andai keukuasaan, tapi geupeakoë cit nilai-nilai keu-agama-an, gaseh sayang, ngon keuteladanan. []
Laporan: Maimunzir
Basa Acèh: M. Iqbal Hafidh
Èditor: Thayeb Lôh Angèn.