Karangan Ulama/ Pujangga Aceh: Bukhari Al Juhari*
Syarat meuntroe ulon teuboh, meunoe sunggoh ulon nyata
Syarat na dua ploh tujoh, he teungku beh ingat rata
Phon phon wajeb meuntroe itu, buet peureulu bek tinggai na
Seumbahyang puasa meunan laku, hukom teuentu suroh beuna
Bawah peurintah dum sinaroe, deungon keudroe pubuet sama
Nyang keudua lon kheun meuntroe, bek na padoe syukor beuna
Syuko keu Allah meunan bagoe, keu raja roe syuko beuna
Teuma nyang lhee lon katakan, peukeurjaan jeub jeub masa
Hukom ade keubeunaran, seukalian rakyat nyang na
Tamong areuta raja nanggroe, jeub jeub uroe pike beuna
Teubiet beulanja lon kheun bagoe, bek geubri roe sia sia
Malenkan sabab keu sukaran, keupeuet taulan lon calitra
Usaha meuntroe keu Sulotan, beusukaan hate raja
Miseue peukayan raja daulat, nyang leubeh that geuusaha
Nyang keu limong lon riwayat, jaga beuthat hukom raja
Tabri ingat raja nanggroe, ta peugah proe rugoe laba
Leumah leumbot kheun sinaroe, bek salah roe ateueh raja
Nyang keu enam ulon bayan, buet Sulotan roh dalam kla
Bak syari’at beursalahan, bicarakan deungon sigra
Meung tan teugah jeuet keukeuji, meuntroe Kadli meuhat gob ceula
Nyang keu tujoh lon bri ingat, ateueh rakyat bek guranta
Bek teukabo meuntroe meuhat, beureundah that jroh lagoina
Ulon teukheun nyang keu lapan, meuntroe budiman beuna kira
Keulua masok Beundaharaan, beugeutuban kira kira
Nyang sikureueng teuma lagi, peutua beurang ri beuna jaga
Dum lasyeuka ngon Sipa-i, alat beude nyang numoi sa
Alat peukayan geubri meuhat, cit beumangat hate dia
Meung jigaseh dum na rakyat, mate meuhat sajan raja
Alat peukakaih jaga nanggroe, beuleubeh roe ingat gata
Uleebalang peutua sagoe, dum sinaroe seumangat gata
Dum peutua uleebalang, beuji sayang ateueh raja
Meunan bangon beuta peugang, tabri rijang ingat ia
Meunan bangon ta peurintah, beuta peugah jeub kutika
Ingat beuthat meuntroe meutuah, dum peurintah bek meutuka
Teuma lon kheun nyang ke 10, ureueng suroh jeub jeub masa
Nanggroe laen teumpat jeuoh, miseue musoh po teumpatnya
Peurbuatan raja sideh, yue luem habeh jeub peukara
Oh jitupeue dum ka meuceh, kadang ku’eh jibicara
Kadang jiprang nyan geutanyoe, dum sinaroe beuthee gata
Beuna ureueng kawai sidroe, nyang jak puwoe dum rasia
Meuka ta thee peurbuatan, ingat tuan tulak bahya
Nyang keu 11 lon nyatakan, meuntroe budiman lon peukhaba
Ureueng meudagang fakir miseukin, ji dhalimin le peutuwa
Ubak meuntroe beuna ra’i, bek na geubri buet enanya
Seupeurti ban sabda Nabi, deungo akhi ngon sibeuna
Irhamu man adl’afuu wa, yurhamu min aqwa likum
Bawah peurintah beuna gaseh, Tuhan leubeh sayang gata
Di akhirat balah keudeh, pham beuhabeh he syeedara
Nyang dua blah lon hareutoe, buettan meuntroe dum peukara
Deungon tuban geuthee keudroe, bek deungon roe beubai gata
Nyang teu 13 ulon rawi, buet beurang ri geukeureuja
Beuna ingat awai akhe, beumeusampe ta bicara
Ulon teukheuen nyang keu 14, tangan murah meuntroe beuna
Bicara akai cit deungon khas, beuindah peurangoe gata
Nyang limong blaih ulon rawi, peubuet bakeuti akan raja
Nyang na guna akan duli, geubalah le deungon sigra
Geubalah jroh uleh meuntroe, meunan bagoe bek na lupa
Nyang keunam blah lon hareutoe, beurang kasoe angkara raja
Uleh meuntroe beugeuteugah, deungon marah geupeusyeksa
Bek biasa langga titah, meunan peurintah meuntroe gata
Nyang tujoh blah ulon teuproe, hukom meuntroe geupeusama
Deungon rakyat raja nanggroe, meunan bagoe bak na bida
Teuma lheueh nyan nyang 18, meuntreo budiman lon peukhaba
Judi candu sibagoe nyan, bek rab tuan deungon gata
Hukom teugah bak syari’at, cit wajeb that tulak gata
Sikureueng blah lon riwayat, kalon meuhat buettan raja
Buettan patot hana bagoe, tuto seungkoe narit raja
Tuto jeungkat keu beurang soe, gata meuntroe dilee saba
Bek tateugah masa sinan, kabui tuan uleh gata
Watee sidroe duek Sulotan, ta ajaran uleh gata
Leumah leumbot miseue bagoe, raja nanggroe tabri aja
Nyang 20 lon hareutoe, jaga meuntroe lingka raja
Ureueng jeuheuet ngon bideu’ah, bek treb ramah deungon gata
Sabab sinyan agama salah, beuta pinah uleh gata
Ureueng biek nyan bek bri jinak, beuthat rancak silagoina
Uleh meuntroe beugeutulak, nyang mustahak bek rab raja
Dua ploh sa lon katakan, mita taulan nyang sibeuna
Nyang le akai ngon bijakkan, sampurnaan teuma gata
Dua ploh dua teuma bagoe, dum sinaroe beuna jaga
Kawai raya wahe meuntroe, ta peugah proe uleh gata
Bek khianat ateueh daulat, bek na jeungkat ngon angkara
Bek elanya ateueh rakyat, beuseulamat dum siajhtera
Ureueng rumoh bak Sulotan, nyang harapan uleh raja
Buet nyang jeuheuet si anu nyan, lakee tuan hukom sigra
Lakee hukom nibak deelat, pinah meuhat yue keulua
Dua ploh lhee lon hikayat, akan daulat ta bicara
Donya akhirat keubajikan, peukeurjaan ta usaha
Dua ploh peuet ulon bayan, meuntoe budiman lon peukhabar
Peumangat hate ulama syiah, hamba Allah dum fakira
Minta tulong nibak Allah, bri seudeukah uleh gata
Yue meudo’a akan daulat, na seulamat nibak bahya
Dua ploh limong lon riwayat, deungon sahbat meuntroe dumna
Uleebalang peutua nanggroe, kheuseumat roe sama beusa
Uleh gata peuseuleusoe, meunan bagoe bek meudakwa
Dua ploh nam lon kheun teuntee, jeub jeub watee ta meudo’a
Lheueh seumbahyang ta meulakee, sijahtra mei ateueh raja
Cit beuseunang hukom rakyat, meutamah daulat akan raja
Meunan lakee bak Hadlarat, cit beukuat keurajeuen raja
Duaploh tujoh lon hareutoe, dalam nanggroe beugeu aja
Amar nahi geuyue pakoe, geunap uroe beuna aja
Meuna meunan meuntroe wazi, hana sabe lam sijahtra
Zahed abed deurajat neubri, peurangoe pi ban ulama
Ureueung peutimang uleebalang, meunan nyang trang meukeureuja
Di akhirat dalam seunang, Tuhan peutimang akan dia
Beugeutolong nyang sukaran, keusakitan nyang enanya
Nyankeuh meuntroe nyang budiman, seulamat iman lam sijahtra.[]
*Alih Aksara oleh: T.A. Sakti
Ketik Komputer: T. Bahagia dan Sufandi.
