Geutuléh Lé: Thayeb Lôh Angen
Khadam Reusam (Budayawan)
Lam padum thôn nyoë takalon, ban Irwandi-Nova jeuët keu Gubernur Acèh, lheuh nyan Irwandi jidrop jipasoë lam grap, dan Nova keu Plt, lheuh nyan lom Nova jeut keu Gubernur Acèh, ka jareuëng tadeungo ureuëng hujjah (kritik) poëpeurintah (pemerintah) Acèh, meuteuntèë Gubernur Acèh. Paléng na sidroë dua sagai nyang na su lam sagoë keudèë kupi. Alèh ho ka ureuëng meuhujjah poëpeurintah uroë nyan.
Media-media jinoë pih sang hana lé saban jiseumidék (menyidik/kritis) jinoë, atè tabandéng ngon yôh masa Gubernur Acèh Zaini-Zakir. Bak hai nyoë jeuët takalon bahwa buët meuhujjah poëpeurintah atawa meusilèë-meusadeuë bak poëpeurintah, nyan kon seubab beutôi atawa salah poëpeurintah nyan, tapi sabab soë poëpeurintah nyan, puëkeuh ureuëng nyang jidukông lé ureuëng nyang meuhujjah atawa kon.
Lagèë kheun saboh caé:
Meunyoë neubeunci le that pu dalèh
meunyoë neugaséh salah pih beuna
Meunyoë meunan ka nanggroë nyoë, meunyoë meunan ka peurangui ureuëng-ureuëng carong, ureuëng-ureuëng na neubeuët ngon na sikula, maka Acèh nyoë ho geuneuk ba. Hana puë that taharap lé bak ureuëng curak nyan nanggroë nyoë.
Puëkeuh nyan meumakna, nyang le tukang meuhujjah di Acèh nyan awak ureuëng peureuté dukông poëpeurintah jinoë. Puëkeuh lam peureuté poëpeurintah nyang hana meunang atawa Partai Aceh ngon kawôm sinaroë geuh, hana tukang hujjah poëpeurintah Acèh? Atawa kadang na sit, tapi media-media hana jipeutrôk hujjah-hujjah nyan, atawa memang awak meudia hana jiteupuë keu hai nyan. Wallahu ‘aklam.
Juët takalon keudroë teuh jinoë, so-so ureuëng nyang kritik pemerintah Aceh yôh masa Zaini-Zakir Gubernur Acèh, dan ureuëng nyan jinoë pu jabatan ka, atawa ho ka?
Peureuté aneuk muda jinoë ka jeuët seumike keu droë, kiban tapeulaku Acèh ukeuë, ureuëng nyang peukateuën kiban keuh nyang mustahak jeuët tayuë peutimang nanggroë nyoë.
Puë hana so teuingat lé, bahwa indatu geupeutheun nanggroë nyoë ngon nyawong geuh. Tiëp jeungkai tanoh nyang geutanyoë gilhò jinoe, na darah syuhada. Puë hana so teuingat lé nyan jinoë. Puë ka jawai teuh bandum?
Na saboh macam teuk ureuëng, awak nyan jihujjah poëpeurintah di keu rakyat, bak media, tapi di liket rakyat, awak nyan jipeuhah baluëm kuët pèng APBA. Peureuté nyoë nah, dum ho jeuët jitamong, dum pat na jih, beurangkasoë jeut keu Gubernur Acèh, tapi awak nyan teutap di dalam.
Meunyoë nyang meunang kon nyang jih dukông, maka jihujjah abéh gah, sang-sang jih malaikat dan gob iblih. Tapi, lheuëh nyan jih ka jeuët jitamong u dalam poëpeurintah, ka seungap jih lagèë laju leumo tacok piët. Meunyoë kheun Apa Maun, ureuëng meunan nyan peureuté guda pajôh lhòk.
Tameulakèë bak po teuh Allah, beugeubi rijang lahé ureuëng bakò-bakò di nanggroe Aceh, ngat makmu sijahtra rakyat keulayi.[]
