BUDAYA-reusam sastra lisan Langgolek nyang meuasai nibak Keucamatan Susoh, Kabupaten Aceh Barat Daya (Abdya), ka geupeusaheh seubagoe Warisan Budaya Takbenda (WBTb) Indonesia thon 2025 le Kementerian Kebudayaan Republik Indonesia.
Seunaheh nyoe geubithee lam Sidang Peuteutap WBTb Indonesia nyang geupubuet i di Hotel Sutasoma, Jakarta, bak 5–11 Oktober 2025 / 13-19 Rabiul Akhe 1447 H.
Seulaen Langgolek, na 16 peuneugot budaya laen lom nibak Aceh nyang geupeutamong lam nan WBTb thon nyoe.
Langgolek: Jangeun Peuintat Eh Aneuk Miet Nyang Arat Gaseh ngon Makna
Langgolek nakeuh jangeun peuintat eh budaya-reusam, atawa kayem geukheuen seubagoe cae “Ayon Aneuk”, nyang geungui basa Aneuk Jamee meuneungui-rusam rakyat Susoh, Abdya.
Cae Langgolek nakeuh calitra-dali gaseh sayang nyang rayek that nibak sidroe ma keu aneuk geuh. Lam budaya-reusam nyoe, sidroe ma geupeueh aneuk geuh ngon cae jangeun leumoh leumbot geunaseh raya, ngat si aneuk bagah teupet teungeuet.
Rot ranjoe cae, Langgolek peusampoe hai gaseh ngon doa, bahwa aneuk nakeuh rahmat nikmat nyang po teuh Allah bri hana pat taboh yum, han jeuet tagantoe ngon beurangkapue pih lam donya nyoe.
Leubeh nibak sikada jangeun peuintat eh aneuk miet, Langgolek nakeuh dali gaseh ma ngon seumpeuna-reusam rakyat Aceh Barat Daya.
Lam irama nyang leumbot, na yum akhlak teuntang gaseh, saba, doa, ngon hajat sidroe ma keu udep aneuk geuh i uroe singoh.
Budaya-reusam nyoe meupeudeuh makna jroh pie udep rakyat bineh laot i barat tunong Aceh, nyang geusatoh lambong yum meusyara lam rumoh droe, keurabeuek, ngon meuagama.
Aceh Geupeusaheh 17 Peuneugot Budaya Seubagoe WBTb Indonesia 2025
Seulaen Langgolek, Aceh ka geupeuteuntee ngon geupeusaheh 17 peuneugot budaya seubagoe Warisan Budaya Takbenda Indonesia Thon 2025. Di antara nyan, na Rapai Banda Khalifah ngon Khanduri Jrat nibak Aceh Timu.
Teuka hajat nyoe jeuet keu dali bahwa heuet rakyat ngon popeurintah Aceh lam geujaga geupapah ban ngon geupeuseulamat wareh indatu nyang mantong na sampoe an uroe nyoe.[]
Rawi lam basa Aceh: Thayeb Loh Angen
Haba asai nibak:
https://acehprov.go.id/berita/kategori/seni-budaya-hiburan/langgolek-dari-abdya-ditetapkan-sebagai-warisan-budaya-takbenda-indonesia
