Salen phon Seulanyan, 21 Beurapet 1438/21 Zulqaidah 1438 H/14 Agustus 2017 M poh 06.32 beungoh. Teuingat meusalen nadham nyoe bunoe teungoh tueng ie seumayang suboh. Baroekon lam teuingat-ingat peue “ie kayat” lon salen/alihaksara atau ketik ulang ‘ohlheueh dimuat Hikayat MoU Helsinki lam koran Rakyat Aceh mulai Sabtu, 5 Agustus 2017. Siat treuk jak bak apel Senin bak FKIP.
Watee nyan ulon teungoh meuloe-loe su, aleh wab teukap dilah/lidah ngon gheum kengkeueng tincu rap hanco/karam/gadoh, ngon beureukat Nadham nyoe mudah2-an beurijang puleh,amin!. Man Hikayat MuO Helsingki dimuat lom bak Sabtu, 12 Agustus 2017. Bak Sabtu, 19 Agustus 2017, ka hana dimuatle bak halaman 14 koran Rakyat Aceh. Aleh pakon?!. Mudah-mudahan seumangat lon han keundo bak salen Nadham Teungku di Cucum nyoe, ngon idin Allah!.
Bismillahirrahmanirrahim
Ulon peuphon ngon nama Allah, nyang that murah dalam donya
Kaphe Iseulam neubri raseuki, bandum sinari agam ngon dara
Lom geumaseh Uroe Akhirat, dum keu umat agama nyang beuna(r)
Ureueng Mukmin agam ngon inong, Tuhan peutamong dalam Syureuga
Alhamdulillah Rabbil ‘alamin, pujoe seukalian keu Rabbana
Bandum pujoe milek Tuhan, nyang Po ‘alam sigom donya
Wasshlaltu wasshalamu ‘ala, Saiyidina Muhammad waalihi washahbihi ajma’in
Rahmat ngon saleuem ateueh Muhammad, wareh ngon sahbat dum seureuta
Lom ateueh nyang ikot sahbat, keunan Rahmat Tuhan bri teuka
Lom pih ateueh ikot meuikot, hingga troih hat Kiamat donya
‘Ohlheueh sheulaweuet deungon pujoe, deungo jinoe lon calitra
Amma bakdu makna komdian, lon keumeung karang saboh calitra
Asai calitra di dalam Kitab, Jawoe ngon ‘Arab lon tueng makna
‘Arab Jawoe lon peu-Aceh, mangat sareh bak tabaca
Lheueh lon suson ka meukarang, lon boeh ngon Nan ban nyang rupa
Kheundak Tuhan Rabbul ‘alamin, Akhbarul Na’im lon boeh nama
Kareuna khaba niekmat Tuhan, meusambot nan deungon rupa
Haba indah indah hana bagoe, tamse pudoe ngon meutia
Lom lon tamse hikayat nyoe, tamse putroe nyang jroh rupa
Badan seudang neungui pi jroh, bee bak tuboeh minyeuk atha
Ngon peukayan leungkap diasoe, intan pudoe kasab sutra
Muka peunoh ban buleuen trang, soe nyang pandang hate suka
Kareuna haba dalam hikayat, donya akhirat le that laba
Soetem pateh that mamfaat, soetem ingat that bahgiya
Tamse putroe bandeng lon boeh, haba seumeuloh that meucahya
Nyang meutuwah galak jih that, ji deungo niekmat hana reuda
‘Oh jipike harok leupah, soena meutuwah ngon bahgiya
Kareuna ji deungo niekmat Tuhan, geubri keu insan agam ngon dara
Hantom putoih neubri sabe, troih ‘an mate hana nyang bla
Diphon gohna langet ngon bumoe, dum geutanyoe goh neupeuna
Nyang niekmat ka Neu peuhase, Neukeumeung bri nyan keuhamba
Teuma neubri sabe-sabe, phon goh lahe troih an kana
Neubri niekmat jroh that meudo-do, got meuato diphon gohna
Hingga kana masa putik, hingga an syik masa tuha
Hingga mate hanatom lapang, hingga tamong dalam syureuga
Nyanka muda muka peunoh, hana nyang sot meupat-pat bla
Jroh meuato seun-seun sitangkok, hingga antok dalam syureuga
Nyanka muda badan seudang, hana lapang got meubanja
Jeuep-jeuep tangkok na geupeugah, jeuep-jeuep ulah na jakitra?
Na nyang mangat na nyang saket, jroh mudlabeth dum peukara
Nyankeu meureud jroh pakaian, nibak badan bajee ija
Nyankeu lon kheun hikayat nyoe, tamse putroe dalam istana
Rupa ceudah neugui pi jroh, bee bak tuboeh minyeuk atha
Soe nyang kalon that meusigak, soe nyang galak nyo bahgiya
Nyokeu mata dijih haloih, jeuet jieu deuh nyang jroh rupa
Leumah jieu hana cacat, dum jeuep-jeuep pat hana cupa
Nyokeu geulinyueng tan meuto-to, jeuet jideungo nyang sibeuna
Nyokeuh hate na ileuham, utoh jipham dumna makna
Nyankeu sabab harok leupah, sabab dijih padok hana
Soe han galak nyan bagoe nyan, buta larangan mata banduwa
Mata duwa dijih teuklok, hana harok meungkon deesya
Geulinyueng tuloe hate hitam, hanjeuet jipham areuti makna
Peue nyang jingo ban geusampoeh, ban angen pruh broh lam tika
Tan sigeutu na mamfaat, tajok alat keusi lasa
Tajok sikin keu sipuntong, tajok tanglong keusi buta
Keusi rumpet tajok subang, keusi rumfang tajok baja
Keusi tan beuet tajok Qur’an, barang kajan han meuguna
Hana sagai na mamfaat, lom meularat kadang pina
Peuekeu sabab nyang jeuet meunan, sabab meuphom dijih hana
Meunan mise hikayat nyoe, beurang kasoe agam dara
Soena tuwah galak habeh, soena paleh nadum tuba
Kareuna haba dalam hikayat, donya akhirat dum deuh nyata
Kisah Donya ngon Uroe Dudoe, HIKAYAT NYOE NYANG PEUNYATA
Soe nyang jeundrong manyoh hate, galak sabe leumah beuna(r)
Hikayat laen ban seukalian, cit ladom tan sinan haba
Na haba nyoe tan haba jeh, disinoe meuceh dum peukara
Hikayat nyoe nyang mei tadeungo, beuta bubo dum calitra
Salah ngon beuna donya akhirat, sit lahe that sinoe nyata
Beuta tem ngui geunap uroe, dum geutanyoe agam ngon dara
Soena meunan sunggoh hate, tanda lahe jih bahgiya
Hikayat laen hana bit nyoe, ladom rugoe soe calitra
Nyang ladom na laba bacut, soetem peubuet ban calitra
Ladom hikayat haba jameun, guree kheun-kheun hana laba
Han jeuet tatueng keu ‘ibarat, miseue hikayat Malem Diwa
Miseue hikayat Raja Ahmad, lom hikayat Si Phan Geulima
Miseue hikayat Malem Diwandak, tadeungo galak laba jih hana
Hikayat biek nyan tadeungo mangat, keupeu ingat meusikrak hana
Ureueng nyang peugah lethat kurangan, hikayat biek nyan soe-soe nyang geuma(r)
Ta deungo mangat bak ji pakhok, simalam seuntok ta meujaga
Meunafaat pitan meung sianeuk, habeh minyeuk peudeh ngon mata
‘Oh singoh beungoh teungeut meupakhok, ban gro mabok keunong ie tuba
Hikayat nyoe beuna tathee, jeuet keu ‘eleumei soe nyang peucaya
Jeuep-jeuep tangkok jeuet keupeu ingat, jeuet keu ubat hate nyang buta
Supaya tathee Tuhan ileuham, na jeuet tapham salah ngon beuna
Asai calitra dalam Kitab, bacut sapat lon suet uluwa
Teuma lon karang sang Hikayat, keupeu ingat agam ngon dara
Soehan pateh meuhat paleh, beuthat beujih aneuk Raja
Han tadeungo kisah Fireu’un, di ujong thon jih ceulaka
Soehan hiro keubuet Nabi, beurang kari asoe Nuraka
Nyang meutuwah dum jipakoe, Tuhan sidroe buka dada
Ri nyang paleh hana meunyum, nyang takheun dum bak jih pura
Pat nyang na roeh sang beurakah, khem meuhah-hah sare subra
Kareuna jipham ban nyang lahe, tan jipike nyan keu makna
Leugat jihue citkeu wayang, tan ji pandang makeusud makna
Meukeusud makna bukon meunan, ban geukheun nyan bek tahawa
Kareuna salah nibak Allah, nyang lon sareh mangat nyata
Kareuna haba nyang lam umum, mit soe teunyum lam bicara
Miseue geukheun bek ngieng hareuem, hana meunyuem soe peurasa
Teuma geukheun dum geuato, cit teusawo bak bicara
Hareuem tangieng geupeh geundrang, hareuem pandang inong dara
Lom pih hareuem tangieng ‘aurat, ta peudeuh that muda bahlia
‘Ohka meunan dumpeue geukheun, rijang meunyuem soe bahgiya
Teulheueh geuato dum geupeutrang, suroh larang droeteu bida
Toh nyang suroh peubuet rijang, toh nyang larang bek takeureuja
Nyang meutuwah rijang teuingat, rijang ji taubat nibak deesya
Bak sipaleh dumpeue bilaih, hate jih kreueh ban meulila
Miseue on eumpeuek ie han basah, ile gadoh dum uluwa
Ri nyang paleh maken paleh, maken tapeugah maken ceulaka
Peue nyang takheun dum jitangkeh, sabab paleh jih ka raya
Nyang meutuwah maken meutuwah, maken tapeugah maken bahgia
Cit jipateh ban peuneugah, that jipapah ban meutia
Peue nyang takheun dum jipike, manyoh hate ji peurasa
Hate jipike (ji deungo) shurah, sare bohbah ngon ie mata
Cit jitem peunyuem ngon jikeucab, naban ureueng kab drien mangusta
Soe nyan hate na peunyaket, dum jingo phet miseue tuba
Makna peunyaket kana paleh, hitam habeh hanle cahya
Soetan peunyaket leumak mameh, jideungo gigeh ban calitra
Roeh ngon jingo pahla le that, jideungo leugat jipham makna
Pahla pih le soetem pakoe, uroe dudoe asoe Syuruga
Soe nyang pateh ban hikayat, di akhirat sajan Aulia
Soe nyan tem ngui sang na Haji, soe nyang beureuhi sang na Tapa
Soe nyang ngo deesya ampon, gaseh Tuhan soetem baca
Lafai takheun shurah tapike, dalam hate bekta lupa
Tango keu niekmat meuteutindeh, hanteu habeh lon peunyata
Lalu tasyuko keu Hadlarat, sabab niekmat hantom reuda
Soehan syuko dumna niekmat, jeuet meularat keunong meureuka
Agam inong beuta deungo, beuta bubo soe bahgiya
Mangat taturi niekmat Tuhan, bri keu insan agam ngon dara
‘Ohka taturi jeuet tasyuko, nabek tahe sangat gila
‘Ohta syuko niekmat Tuhan, teuingat yohnyan droeteu pahna
Teuingat droe Tuhan peujeuet, zat ngon sifeuet Tuhan peuna
Dumpeue neubri keu geutanyoe, malam uroe bekta lupa
Soe nyang sabe ingat meunan, ureueng nyan han keunong bala
Jeuet keu rakan jih ngon Tuhan, neu gaseh sayang soe meunan na
‘Ohneu gasehle Tuhan sidroe, neu pujoe gata han reuda
Beurang kasoe Tuhan pujoe, patot dudoe asoe Syuruga
Deungon beureukat Nabi Muhammad, Tuhan Hadlarat peutroih pinta
Hate ikhlas ingat keu Tuhan, bekna sajan meujampu riya
Meunyo meujampu riya disinan, meureuka Tuhan pi hana reuda
Jikalee meunan dum geutanyoe, keu Poteu sidroe bekta lupa
Wajeb bandum tasyuko niekmat, bek lale that agam ngon dara
Nyoe tadeungo saboh panton, beuta seuon ateueh jeumala
Beuta pateh dum tabubo, ingat hepo bek darohaka
Tabloe aweueh peugot keu makjun, tataguen ngon bak mangusta
Meungka troe pruet peunoh buthun, hanpeue hireuen keupo areuta
Koh bak bayi plah keu tungkat, seutot urat beukah lanja
Ban Sipa-i lheueh lam ikat, han jiingat pujoe Raja
Peugot peungat duek bak dapu, cok jeumuju dalam ceureupa
‘Ohka peunoh ban nyang nafsu, keu Tuhanku that jilupa
Hana sagai teuingat keu Po, nyum jih bako kon jih hamba
Han padoli keu Po sidroe, nyum jeuet buet droe ban nyang hawa
Hana jithee droe jih insan, peuneujeuet Tuhan dalam donya
Nyoe pih meunan wahe taulan, keu Tuhan bek sagai lupa
Bekta sangka droeteu bako, Allah kon Po bekta sangka
‘Ohban taeu droeteu lanteueh, ngon kreueh ceubeueh teuga baja
Hanle ingat nyan keu Tuhan, nyum gata kon Tuhan peuna
Taingat keudroe keu Po haihom, nyankeu kawom biek meureuka
Tuhan beuah taeu laku, cotle iku sang dumpeue na
‘Ohneu puta hanjan kheun wee, yohnyan jithee keunong meureuka
Nyankeuh lon kheun bek jeungkat that, beuta ingat salah nyangka
Beuta ingat le peue ka neubri, uleh Rabbi keu bandum hamba
Bube nyangka tasyuko tan, talakee ampon jeueb kutika
Taingat droe ban Kleng salah, jeuep-jeuep naf’ah lam meureuka
‘Ohnoe habeh haba Khuteubah, nyoe lon kisah haba mulia
F’aklamu ya Ikhwany, tathee sare he syeedara
JINOE LON PEUGAH NIEKMAT ALLAH, HAN EK LON KISAH PADUMNA RAYA
Teutapi lon peugah ladom-ladom, soe jeuet muphom ka meumada
Raya ubit agam ngon inong, deungo bak keunong bek meuriba
Lon meung peugah niekmat Tuhan, ubak insan agam ngon dara
Niekmat le that dum meutindeh, han ek habeh lon peunyata
Seupeurti ban Fireuman Tuhan, ayat Quru’an sajan ngon makna
Wain ta’uddu nikmatallahi, La tuhshu haa
Adat tabileueng niekmat Allah, han ek habeh bak tahingga
Kareuna niekmat le meutindeh, han ek habeh bak bicara
Meung nyang neubri keusidroe-droe, beurang kasoe han ek jihingga.[]
CATATAN: Sebagaimana pernah saya singgung pada catatan sebelumnya, bahwa Nazam Teungku Di Cucum merupakan Nadham terbagus sejauh yang saya ketahui. Patut dipergelarkan untuk dibaca di rumah-rumah, di tempat pengajian (Bale Seumeubeuet), Meulasah, Mesjid, Sekolah, Fakultas, Universitas, Lembaga negeri dan Sawasta. Khusus di beberapa gampong dalam tiga kecamatan di Aceh Besar, pembacaan Nadham Teungku di Cucum biasa diadakan pada: dalam bulan-bulan Maulid, menjelang bulan Puasa, Pembukaan dan penutupan Seumeubeuet/libur atau karena melepaskan nazar/kaoy dan lain-lain!!!. T.A.Sakti.
