Prang Paya Cöt Triëng
Geukarang Lé: Thayeb Loh Angen
Penyair dari Sumatra
Paya Cöt Triëng na di Palôh Tunong
nibak saboh jan hinan prang raya
prang meukasyuk meuruk-ruk meuranggông
hinan meuhudôm dum teuntra-teuntra
Alèh pih paki alèh pih kiban
geupeu-ék prang ka hinan lam paya
ladôm teumimbak ngön budé panyang
ladôm hai rakan meuhila-hila
Ulôn kheuën bhah nyoë lam damèë nanggroë
yôh paya ka geudoë geupula padé
yôh masa prang hinan dum bak raboë
teumpat meusom droë pasukan ramèë
Han jeuët lôn peutrang ‘adeuëb prang hinan
prang kön meuneu’èn kön haba meukra
seubagoë teuntra hanjeuët lôn peugah
meuikat surah sumpah béntara
Seubagoë pahlawan bah pih peudéh
han jeuët lôn tuléh rangoë lagoina
han jeuët lôn peugah keu zalém musôh
han jeut lôn peutrôh alang di kamoë
Saboh sagai nyang jeuët ulôn peugah
nyang laén bhah bah rusia kamoë
nibak saboh jan lam paya Cot Triëng
beureutôh prang nyang meugok-gok dônya
Prang geuriliya paléng raya nyan
bak phôn milenium lhèë meutabèë
paya nyan meukasyuk ngon bhôm raya
meubura-bura meuuroë-uroë
béyasa lam pilôm kalon meunan
jibhôm nibak tank ngön peusawat prang
dum makheuluk teukeupak ju hinan
bhôm jisinthom ka di keuë mata
Nibak watèë nyan tan na soë tulông
bah pih taranggông abéh ië mata
hajat lôn jinoë e bansa Acèh
hajat lôn beujroh na marwah nanggroë.
Banda Acèh, Lasa, 6 Februari 2024 / 25 Rajab 1445 H
Thayeb Loh Angen.[]