ACEH TIMU – Waki Bupati Aceh Timu, T. Zainal Abidin, S.Pd.I., M.H, geusaweue ngon geubi haba seunambot bak keurija Peusaheh Pengurus Wilayah Himpunan Ulama Dayah Aceh (PW HUDA) Kabupaten Aceh Timu seuen 2025–2030.
Keurija nyang geupubuet di Aula Serbaguna, Meuligoe Aceh Timu, Gampong Gampong Jawa, Kecamatan Idi Rayek, Kabupaten Aceh Timu, Hameh, 9 Oktober 2025 / 17 Rabiul Akhe 1447 H
Peusaheh nyan geupeusah langsong le Peutuha Pengurus Besar (PB) HUDA Aceh, Dr. H. Anwar Usman, M.M, nyang akrab geulakab Abiya Kuta Kreung. Bak keurija nyan teuka sit na meupadum droe ureueng bako, nyakni Kapolres Aceh Timu, Peutuha MPU Aceh Timu silaku Peutuha Panitia, Abu Idris Julok, camat-camat, peumpinan dayah, ureueng malem, sireuta jamee-jamee laen lom.
Lam peunutoh geuh, Waki Bupati T. Zainal Abidin geubi haba seulamat keu babandum pengurus PW HUDA Aceh Timu nyang baro nyan. Droeneuh nyan geupakat babandum pengurus ngon ulama dayah beugeupeukong saban sare buet ngon popeurintah daerah lam geuhiro umat bak raueh nyang geurila le po teuh Allah Taala.
“Jak geutanyoe tameumat-mat jaroe, beusanteut baho, tameurakan lam buet tapakat umat u raueh nyang geurila le po teuh Allah Taala. Kamoe nyakin, HUDA ek geukawai syiar bak geujaga aqidah umat lage syariat Ahlussunnah Waljamaah di Kabupaten Aceh Timu,” geubi peunutoh le Waki Bupati.
Droenueh nyan neupakat banbandum pengurus HUDA beujeuet keu ureueng nyang dong i keue bak buet peugot rateb umat ngon buet peukong yum-yum Iseulam bak rakyat barollah.
Lam waate nyan sit, Peutuha PW HUDA Aceh Timu, Tgk. Muchtar H. Ibrahim, S.Sos, lam haba seunambot geuh geupakat babandum pengurus beuek geujaga amanah nyang ka geutanggong nyan, beuek geupubuet buet ban hajat.
“Buet HUDA nakeuh tabri suloh keu umat. Maka tapubuet keuh amanah nyoe beuikhlah beumeusigak. HUDA nakeuh tanggong jaweueb akhlak geutanyoe babandum, roh popeurintah, lam buet jaga ngon peumakmu udep rakyat nyang meuagama ban Aqidah Ahlussunnah Waljamaah,” geupeuteuntee le Tgk. Muchtar.
Tgk. Muchtar geupeugah, mustahak tameusaboh droe lam le curak ragam rakyat jinoe, ngon haba meuteuntee, motto “Bersatu dalam Perbedaan”. Geupeugah, seumangat meusaboh jeuet keu rungka lam ukhuwah Islamiyah ngon dukong peunutoh popeurintah nyang siraueh ngon yum-yum syariah.
Bak watee nyan sit, Peutuha PB HUDA, Abiya Kuta Kreung, geuharap kepengurusan baro PW HUDA Aceh Timu beujeut keu tameh peunteng lam buet peucarong bangsa, nyang mustahak bak peukong aqidah umat.
“Beukeuh Allah bri, ngon na pengurus HUDA Aceh Timu nyang baro nyoe, geutanyoe saban-saban ek taprang pham-pham nyang sisat ngon beuek tajaga gleh aqidah umat. HUDA beujeuet keu rakan popeurintah lam dukong peunutoh syariah ngon jaga maruwah Iseulam di Aceh,” geukheun le Abiya Kuta Kreung.
Keurija peusaheh nyang khidmat dan saban sare meusyara nyan geutop ngon doa meusigo nyang geupimpin le Abu Idris Julok, seubagoe harapan beukeuh Allah bri kepengurusan baro HUDA Aceh Timu ek geupubuet amanah ngon istiqamah ngon beuna beureukat keu rakyat dan sagoe-sagoe nanggroe.[]
Laporan: Maimunzir.