LHOKSEUMAWE – Waki Wali Kota Lhokseumawe, Husaini Pom geukalon Geudong Kesenian Lhokseumawe di Gampong Mon Geudong, Keucamatan Banda Sakti, Kota Lhokseumawe, Aceh. Geudong nyang ka meuthon-thon hana lheueh nyan geupuga bak thon 2017 ngon beulanja Rp 11 miliar nyang asai jih nibak Dana Alokasi Khusus (DAK) Aceh.
Geudong nyan ka meubalom hi. Na meupadum pat kaca nyang ka bicah. Di blah laen, naleueng pih ka jitimoh leuhu di seulingka peuneugot nyan.
“Ulon tuwan bri peurintah keu Dinas Pendidikan dan Kebudayaan Lhokseumawe beusigra geupeuguna geudong nyoe. Bek sampoe geudong nyoe jeuet keu bukti han keumah tapubuet,” geunariet le Husaini, Rabu 12 Maret 2025, bak wartawan di Lhokseumawe.
Husaini Pom geupeugah bahawa meupeulaku geudong kesenian suwah keubiet buet, sampoe geudong nyan na munafaat keu seuniman ngon jeut keu teumpat peudiyeueng acara laen lom di Kota Lhokseumawe.
“Wajeb got geuuroh nyan, ngat jeuet keu Pendapatan Asli Daerah (PAD) Kota Lhokseumawe rot tapeusewa keu teumpat peugot acara, mulai nibak peudiyeueng ase neubuet utoh, peuleumah-leumah, surah proh hai, sampoe acara meuniaga laen lom,” geukheun le Husaini Pom.[]
Asai haba lam basa Melau/Indonesia: Kompas.com. Geuubah keu basa Aceh le Thayeb Loh Angen.
