[Calitra Keunarang] RAJA DONYA – Raja Nanggroe – Seunurat 1
Keunarang: Thayeb Loh Angen
Penyair dari Sumatra, pokeunarang novel Teuntra Atom, Novel Aceh 2025,
Syair Rubai Syariat Musafir.
Nibak tingkeuep ceureumen rumoh geuh, Malem Banda geukalon aneuk muda inong ngon agam meuriti di leuen meusijid nyang meuhalak sangkira dua reutoh hah tiep buju rungka. Peureute aneuk muda nyan jisok bajee itam siluweue itam, jijak meuranjoe-ranjoe jisurak-surak ube na jitem itubiet su jih. Su awak nyan tumboh u langet di ateuh meusijid meububong seumen wareuna biru.
Sira geuraba bineh tingkeuep ceureumen nyang geupeugot nibak bak mane nyang geupleue wareuna kuneng kunyet, Malem Banda geujingeuk u luwa.
“Cuda Rabiah, Cuda Halimah, hokeuh jinak jak awak nyan,” tanyong Malem Banda bak dua droe ureueng inong nyang beungoh nyan ka peuet go geuulee ili i keu rumoh Malem Banda, saboh peuneugot meubinteh kayee nyang meububong on meuriya, bak bineh blah rot baroh meusijid.
“Awak nyan tuntut Raja Nanggroe, wahe Malem Banda,” seuot ureueng inong nyang ngui ija sawak mirah.
“Awak nyan jilakee Raja Nanggroe beugeupeubateue idin peugot rumoh peuniyoh bak bineh gunong meuh lam uteuen lindong,” timplak ureueng inong nyang ngui ija sawak ijo, han geutem theun talo.
“Bak lon geutanyong, kon bak gata hai Halimah,” Rabiah geublie Halimah.
“Ateuh lon geukalon saknyoe, beh keupue geuh gata,” Halimah geubeb, geupeuleumah bibi itam sukla ka bulat lage lintah troe.
Bandua ureung inong nyang teukhem teuseungeh-sengeh, geujak ju bagah-bagah, ngat rijang jioh nibak Malem Banda. Meunyoe le pue geutanyong lom le Malem Banda, bandua ureueng inong nyan yo geuh han lheuh buet bak uroe ek nyan, intat bu u meusiid, na khanduri leuho uroe.
Moto ata Rabiah ka awak sewa. Moto ata Halimah, bak geuba le lakoe geuh geujak beulanja u peukan saknyoe, ka reuloh, teungoh geupeugot, sangkira lheuh Asa baro lheuh pih imoto nyan. Meunan geupeugah le tukang peugot. Ka keuh, Rabiah ngon Halimah suwah geutingkue peunajoh leuho, geuba ngon aki. Nibak rumoh teumpat taguen bu ngon meusijid na jarak sangkira dua reutoh dua ploh deupa. Sigo ba dua ploh limong boh kulah sapo, dua droe limong ploh boh kulah. Maka ureueng nyan suwah wo riwang ba bu nyan dua ploh go jak, sabab na siribee boh kulah bu nyang geuyu ba bak Tgk Imum Chik.
“Teurimong gaseh, cuda-cuda,” surak Malem Banda. Tilat. Ban dua ureueng inong jeh ka hana geuseuot le. Ka laloe geuh ngon calitra boh campli ngon bawang ka meuhai yum lam peukan nyoe. Meunyeo han rijang jipeutren yum alat maguen, ka dit laba ureueng nyan bak meukat bu.
Angen barat jipot meusap-sap jitamong rot tingkeuep ceureumen, tapi siat sagai, lhueh nyan ka lage sot lom seuuem meuhap-hap. Uroe tarek tan jitren ujeuem ka dua peukan. Malem Banda geutop tingkeuep, geujak u kurusi di keu meh teumpat beyasa geuduek geuteumuleh.
“Ka lhueh ulon tuwan peugah, han jeuet tapeuek si Dun nyan keu Raja Nanggroe, tapi han geupateh le ureueng-ureueng malem ngon bako,” Malem Banda geuduek di keu laptop warna mirah hu, tapi na siat, geutop lom.
Malem Banda geubeudoh geupeuhah lom tingkeuep, geuasek-asek ulee siat, geugisa u meh, geucok talipun, geuteugon-geugon layeue. Na siat ka deuh su ureueng lam talipun nyan.
“Beutoi, Malem Banda, ka lheuh kamoe peugah, tapi Raja Nanggroe han geupateh,” deuh su Ampon lam talipun.
“So nyang jok beulanja keu rumoh peuniyoh rap gunong meuh nyan, Ampon.”
“Syekh Marhaban, raja minyeuk nibak Qatar, Malem Banda.”
“Pu buet geuh Syekh nyan.”
“Na tambang gah geuh di Khazakhstan, tambang meuh di Afrika.”
“So peuturi Syekh Marhaban ngon Raja Nanggroe.”
“Teungku Leupon, po rumoh Peuniyoh Cicempala di Singapura ngon Malaya.”
“Got. Teurimong gaseh.”
Rot tingkeuet ceureumen, Malem Banda geukalon aneuk muda mantong punoh leuen mesijid, na nyang ek u ateueh kurusi, peugah haba. Raja Nanggroe ngon Teungku Leupon nyang meujanji jak u meusijid ka hana trok.
Peureuete aneuk muda nyang na sangkira siribee droe nyan han jiwoe sampoe leuho uroe.
Tgk Imum Chik geuyu bagi-bagi bu leuho nyang geuba le Rabiah ngon Halimah bunoe. Baro sa, na ureueng aleh so, geukirem peng bak Rabiah keu yum bu siribee kulah geuyu ba u meusijid beutrok segolom leuho uroe nyoe. Lheueh bu ngon seumayang leuho, peureuetee aneuk muda nyan jiwoe u teumpat droe nafsi-nafsi, hana meurumpok ngon ureueng nyang jinak meurumpok. Tapi, haba pu nyang awak nyan peugah ka jireukam ka jituleh le tukang ba haba ka meusipreuek bak media-media, ka jeut takalon ban sigom donya.
Malam uroe, lheueh seumayang Insya, lheueh geubaca meupadum boh ayat Kuruan ngon surah, Malem Banda geuteugon-teugon layeue talipun. Na siat ka deuh su lam talipun.
“Nyoe ulon tuwan, Malem Banda, wahe Teungku Leupon.”
“Got, Malem Banda, pu na nyang jeut ulon tuwan bantu.”
“Pukeuh mungken meunyoe neupeugah bak Raja Nanggroe ngon Syekh Marhaban, beugeutem peubateue peudong rumoh peuniyoh rap gunong meuh. Beulanja nyang geunak ngui keu peugot rumoh peuniyoh nyan, geungui keu peugot rumoh peuniyoh di teumpat mantong.”
“Kiban roh lon peugah. Meunoe, beulanja ka le meupeutubiet. Lom pih hinan got that tapeugot rumoh peuniyoh, wahe Malem Banda.”
Malem Banda geupeuputoh ju haba ngon geutop talipun.
Na siat, geuteugon-teugon lom layeue talipun. Deuh su chang-ching. Na padum trep, deuh su talipun, lam basa Arab, lheuh nyan lam basa Inggreh.
Malem Banda ngon ureung blah deh talipun di nanggroe jioh geumeuhaba lam basa Inggreh na meupadum minet.
“Meunyeo droe neuh nyang peugah bek ulon tuwan peugot le, wahe Malem Banda, maka jinoe ju ulon tuwan piyoh. Beulanja nyang ulon jok keu peugot rumoh peuniyoh nyan, hokeuh ulon tuwan ba, neubi peunutoh, Nyang Mulia.”
“Nyan ka meubalek, Syekh Marhaban. Han mungken ulon tuwan peurunoe gure.”
Malem Banda ngon Syekh Marhaban geukhem-khem siat, lheuh nyan geutop talipun.
Malem Banda geupeuhah pinto warena coklat nyang geupeugot nibak papeuen bak bayu. Di meusijid deuh su aneuk muda meurukon. Malem Banda geutubiet u luwa rumoh, geurok pinto reumoh keulayi, geujak u keudee kupi rap bineh krueng. Angen malam teuka meusap-sap, jigantoe meuhap-hap seuuem bunoe uroe.[]
