Aneuk Jampôk
Deungö lôn kisah khabaran zameun
masa keurajeuen Saidil Ambia
masa kerajeuen Nabi Sulaiman
nyang mat hukôman ban sigom dônya
Nibak siuroe nabi jak meuèn
deungön angèn sajan seureuta
Nabi neuduek ateuh kurusi
angèn bapot lé ban siklèp mata
Oh ban saré trôk bak saboh teumpat
neupiyôh siat neugantoe raja
Nabi tanyöng nibak dum cicém
töh siri katém lôn bôh keu raja
Seuôt jampôk tuwanku ampôn
nyoe pat aneuk lôn nebôh keu raja
sabab aneuk lôn rupa ceudah that
lagi ngön hibat le bulée mata
Mata bulat babah meukawét
cit get that sabét meunyoe jih raja
Nabi Sulaiman teuseungèh teukhém
dum cicém laén jikhém meubura
Malèe geuh that-that di teungku jampôk
teuduek-duek teuseupôk meublèk-blèk mata
jampôk ka malèe teutap ji-iem droe
sampoe ‘an jinoe sabé jipeukra
Teuma teuka burujuek balèe
han kutém dikèe jampôk keu raja
teuma lom teuka po cicém murông
jigrôp-rôp lambông jicoh lam mata
Teuma lom meusu po cicém tiyông
han akô dilôn meujih keu raja
seudang beuragoe yang leubeh tari
kupiyah haji ngön tupi waja
Teuma jimeusu cicém keutôk-tôk
meuhan jeuet jampôk bah lôn keu raja
kareuna bak lôn le that piyasan
lôn pèh canang prang ‘oh malam jula
Teuma seuôt cicém raja ngang
jaroe dijulang ateuh jeumala
ampon Tuwanku meuribèe ampôn
galak that dilôn gopnyan keu raja
Kareuna gopnyan le that meuneuèn
geupèh canang prang ‘oh malam jula
geureuduek tampi yang pèh canang prang
tadeungoe keujam ban saboh dônya
Teuma jimeusu tok-tok beuragoe
hana meusoe-soe tabôh keu raja
seudangkan dilôn kupiyah busoe
hana si uroë lakèe keu raja
Teuma jidamèe uléh keudidi
si rajawali tabôh keu raja
tok-tok beuragoe tabôh keu waki
tabôh keurani po cicém pala
Leuek bangguna tabôh bupati
si mirapati jeuet keu wedana
kleung putéh ulèe jeuet keu polisi
kepala nanggri aneuek ngang dama
Tabôh keu hakim cicém paikô
po aneuk tulô hakim agama
keu penerangan po cicém subang
aneuk cakeuek blang keupala teuntra
Cicém peureuléng ke keuchik gampông
cicém semantung keu ureueng runda
po teuteuet pangeue jeuet ke peubantu
cicem mirahrueng guru sikula
Kisah po jampôk lôn piyôh siat
jinoe lôn sambat keu cicém paya
cicem beuruwak jeuet keu mak bidan
sabab digop nyan geukuw’a-kuw’a.[]
Sumber: Lagu-Lagu dari “Orkes Djeumpa Atjeh” Djilid I Cetakan II,
diterbitkan oleh H. Razali Djuned, pegawai Kantor Urusan Agama Kotamadya Banda Atjeh.
Dicetak oleh Pertjetakan Negara, Banda Atjeh, 1967. Dikutip portalsatu.com dari acehbooks.org.
kisah pojampok