MEULABOH – Malam Seulanyan, 12 Oktober 2025 / 20 Rabiul Akhe 1447 H, na dua droe musisi nyang ka meugah ban sigom Aceh, nyakni musisi asai Aceh Barat, Said Azmi, ngon Maimunzir asal Aceh Timu, geupeuseunang punyueng rakyat Meulaboh.
Dua musisi nyan ek seueng hinan, nakeuh geupeuramee peuingat Uroe Ulang Thon (HUT) Kota Meulaboh keu-437 ngon dan Pekan Kebudayaan Aceh Barat (PKAB) nyang geupeupasti meusyuhu. Seulaen ureueng nyan dua, na sit meuploh droe musisi ngon seniman laen ka geupeuteuntee peudiyeueng buet jak peuseunang rakyat.
Acara nyang geupubuet le popeurintah Kabupaten Aceh Barat nyang jeuet keu buet peunteng keu rakyat bak peuingat uroe lahe Kota Meulaboh nyang geuthee seubagoe Kota Bumi Teuku Uma.
Seulaen geupeubuet meumacam bagoe piyasan budaya, peudiyeueng seuni, ngon peuleumah UMKM, seueng peuseunang rakyat pih jeuet keu saboh hai nyang ek peugalak ate raykat barollah nyang mustahak.
Sidroe nibak bintang jamee nyang ka geupreh-preh teuka nakeuh Said Azmi, ureung meulagu di Aceh nyang bak thon 2000 geuturi le rakyat rot lagu patriotik “Teuku Umar Johan Pahlawan”.
Said Azmi geupeugah droeneuh nyan seunang lagoina jeut jak peuseunang keulayi rakyat Aceh Barat, pu lom lam keurija raya nyang meuyum sijarah ngon reusam nyoe.
“Nyeo nakeuh peuluweueng nyang hayeue that keu ulon tuwan, ka jeut ulon peuseunang keulayi rakyat Aceh Barat. Lagu Teuku Umar keunak ulon ba seubagoe takzem keu pahlawan bangsa geutanyoe nyang meuasai nibak Meulaboh nyoe,” geupeugah le Said Azmi ngon seumangat jroh.
Said Azmi geupeugah, droeneueh nyan deuh malam nyoe, geupeusaneuet ngon nyeum nyang bit meuaceh nyang meusaboh ngon nyeum musik modern, ngat haba perjuangan ngon yum reusam teutap meuseumong keu geutueng le babandum bagoe rakyat, teuleubeh lom ureueng muda-muda.
Nyang lagak sit, ureueng meulagu Maimunzir nyang geuturi ngon lagu hits-geuh “Poh Bandet” ngon “Hak Reman” na sit geupeumeusyuhu seueng peuseunang punyueng rakyat HUT Meulaboh ngon PKAB.
Maimunzir nyang jino ka geujak kuliah di Program Studi Bahasa dan Sastra Aceh di UBBG (Universitas Bina Bangsa Getsampena) geupeugah, buet nyoe jeuet keu teumpat peuteng keu musisi daerah bak jak peulemah karya meusigo ngon peuseulamat musik meubudaya-reusam Aceh.
“Khanduri nyoe kon keu peuseunang-seunang ate sagai, tapi keu jeuet keu jiek um seuniman Aceh. Ulon tuwan ucap teurimong gaseh Nyang lambong ukeue po acara nyang ka geubi watee ukeue kamoe jeuet peuleumah karya bak keurija dum noe raya,” geupeugah le Maimunzir, nyang aktif seubagoe jurnalis senior.
Maimunzir geupeugah, lagu Poh Bandet nyang meuhi garang gurangsang jeuet keu idang i keue keu peuseunang punyueng rakyat.
“Ulon tuwan hawa babandum ureueng nyang teuka kalon ikot melagu ngon seunang raya. Beuek keuh keurija nyoe jeuet keu peutamah kong taloe syara geutanyoe seubagoe rakyat Aceh Barat,” geupeugah le Maimunzir.
Lam watee nyan, Zulkifli atawa Dek Zoel, panitia nyang pubuet geupeusampoe bahwa ngon teuka musisi Aceh lagee Said Azmi ngon Maimunzir nakeuh atot nibak buet popeurintah daerah lam geupeuturi neujeuet seuni ngon budaya reusam Aceh Barat u tingkat nyang lebeh luwah.
Seulaen piyasan musik, keurija HUT Meulaboh keu-437 geupasoe ngon meubagoe buet laen, lagee peulemah ri budaya, peuleumah ri UMKM, peuleumah ri haneng peunajoh, peuleumah ri ekonomi kreatif, seueng seuni tradisional ngon peudiyueng di seueng meuploh droe ureung meulagu Aceh.
Bak malam pucak keurija HUT Meulaboh ngon PKAB geusaweue le meuploh ribee rakyat nyang peupunoh teumpat acara geujak kalon areutih-areutih meulagu, sira ngon geucok nikmat bak ramee lagoina ureung i uroe jeuet kota Meulaboh nyang keu-437.
“Kamoe meuharap buet nyoe kon keu peuseunang ate rakyat mantong, tapi jeut keu peukong nyeum galak keu budaya-reusam droe teuh ngon seumangat meusaboh droe sabe-sabe rakyat barollah,” geukheun le Dek Zoel.
Ngon geuteuka le seuniman lagee Said Azmi ngon Maimunzir di HUT Meulaboh keu-437 ngon PKAB, geunyakin jeuet keu saboh khanduri raya nyang paleng meuseyuhu i Aceh Barat thon nyoe.[]
Laporan: Maimunzir.