ACEH TIMU – Waki Bupati Aceh Timur, T. Zainal Abidin, S.Pd.I., M.H, geujak bak uroe peuingat lahe (moled) Nabi Muhammad SAW 1447 H nyang geupubuet meusaneut di Masjid Al-Kubra, Keucamatan Julok, Kabupaten Aceh Timur, Lasa, 7 Oktober 2025 / 15 Rabiul Akhir 1447 H.
Keurija bhah agama nyang na sabe geupubuet tiep thon nyan geupeuramee le meureutoh droe jamaah nibak gampong-gampong nyang na di Keucamatan Julok. Nibak beungoh kon, rakyat ngon urueng malem ngon aneuk muda hinan ka meusapat meusak-sak di leuen meusijit geujak kalon babandum keunarang acara moled nyang geupeupunoh ngon dike, seulaweuet, surah agama, ngon khanduri moled saban sare ube na ureueng nyang teuka hinan.
Lam peuneugah seunambot, Waki Bupati T. Zainal Abidin geupeusampoe rasa syuko bak poeuh Allah nyang ka geuidin meuase keurija moled Nabi nyang jeut keu buet ganceng peunteng keu umat Iseulam lam bhah peukong iman ngon meunumat keu agama nyang geuba le Rasulullah SAW.
“Peuingat moled Nabi kon keu uroe raya sagai, tapi keu peuingat geutanyoe beujeut tasatoh akhlak Rasulullah lam udep teuh tiep uroe Tuhan. Jak geutanyoe tacok faedah buet nyoe keu tapeukong ukhuwah islamiyah, tapeukong yum tameuiseulam, tapeutimoh seumangat saban sare lam tapeugot Aceh Timu nyang meuagama ngon sijahtera,” kheun Waki Bupati.
Droenueh nyan geupujoe bueat rakyat Julok nyang geujaga adat meagama ngon sabe na geupubuet keurija meuseuraya saban-saban. T. Zainal geupeugah, seumangat meuseuraya ngon meusyara meukawom meubansa nyang geupeuleumah le rakyat hinan nakeuh ceureumen yum islami nyang geupeuwareh le Rasulullah SAW.
Trok teuka sit lam buet nyan Camat Julok, geuchik-geuchik, KUA Julok, ureueng malem, ureung bako, ngon waki nibak Majelis Permusyawaratan Ulama (MPU) Keucamatan Julok. Leumah takalon na rasa meusyara meukawom ate Waki Bupati geusilaturahmi ngon geupeugah haba sajan rakyat lhueh khanduri moled.[]
Seunurat haba le: Maimunzir.
