ACÈH TIMU – Di miyub langèt teudôh bumoe Aceh Timu nakeuh dua droe ureueng nyang teungòh jak meujandréng, mandua ureueng nyan Peumimpin Nanggroe. Teuseuhèh teukhém ka deungön ramah-tamah.
Sidroe dari ureueng nyan nakeuh Waki Gubenur Aceh, H Fadhlullah, S.E, meunan sit sidroe teuk Waki Bupati Aceh Timu, T. Zainal Abidin, S.Pd.I.,M.H. Dua droe ureueng njang lagè-lagè meusaboh droe lam saboh jangeuen hamba, peuhamba droe keu rakyat, Jumu’at, 7 November 2025 / 16 Jumadil Awai 1447 H.
Momen meusapat meunan dua geuh bukönkeuh keu alakada acara seumaweue keurija lagèe njang ka ka, di liket langkah nyang teuayôn teunang nyan, nakeuh teukubah saboh seumangat rayek meuleumpah na rayek keu Aceh Timu njang leubèh that na jroh, meuseuniya ka deungön martabat njang meulambông lagoina.
Toe ureuëng nyan dua geuh jeuet keu poh beurakah mata ureuëng silingka nibak watèë nyan, bukön kareuna meuhayeue-hayeue jabatan, seumata jih nakeuh kareuna caya karib geuh nyang ikheulah meuleumpah na ikheulah, hana aneuk rinyeun njang peucré dua ureueng nyan lam hai Peutua ngön kön Peutua.
Mangat that bak takalön dua geuh watèë geupegah haba ka deungön langkah teuayôn leumöh. Si gö-gö teuseuhèh teukhém, alamat nyan nakeuh, saboh alamat lam haba dua ureueng cukôp brat meumakna that-that lom lam suasana hate njang saban-saban sambôt meusambôt.
Lam watèë nyan dua ureueng nyan na so njang kawai, meunan aturan mustahak teureutéb lam peumeurintahan, nakeuh dua geuh geupeugah-peugah haba laju lagèë na, lagèë dua droe rakan njang ka trép geumeurakan, njang teungöh bagi-bagi lumpoe raya keu Aceh Timu njang leubèh makmu.
“Nakeuh, tapeugöt daerah nyoë, tanyoe kön simata bak reucana teuh mantöng. Inoe tapeureulèe sit cara, reucana dengön usaha töh nyang ijak meujandréng ngön geutanyoe,” geupegah lé Waki gubenur Fadhlullah.
Mata gop nyan geukalön jiôh ukeue ateueh garéh tupat, lagè-lagè deuh gaukalon Acèh ‘oh masa ukeue beutrôk lagèe harök geuh. Nakeuh Aceh nyang maju ka deungön masyarakat jih nyang makmu.
“Cara, meunyoe hana meujandréng ngön ôseuha teuh nyan langkah nyang hana meuho langkah. Reuncana, meunyoe hana tapeugah-peugah nyan nakeuh keurija njang hana wasé. Kareuna nyan keuh, mandum geutanyoe nyoe suwah saléng tamumat-mat jaroe bah mangat arah seumeugöt nyoe nak bèk meuawö,” geuseumöng lom haba lé ureueng leumboi dua di Aceh nyan.
Gob nyan pih hana tuwö geupakat mandum puereuté peumeurintahan, urueng bakö, akademisi, ka deungön mandum lapéh meulapéh masyarakat nyan ban mandum geupakat meureuekreuek haba ka deungön satöh – meusatöh beuteudöng lagèe teuglöng bak u, saban sakri tapeubeudöh roh teuh mangat tanyoe trôh bak saboh tujuan teuh nyang jroh nyoe.
“Kamoe nyoe hanjeuet meujak sidroe meuh. Kudrah tanyoe manusia nyoe saléng teuikat, saléng meukumat, saléng seumangat peuseumangat. Tameureunoe keuh dari pijampôh puréh, menyoe sikrèk puréh mangat bak patah, meunyoe le puréh nyan pue lom ka saboh ikat jih, ubé na brôh jeuet tasampôh mandum meusampôh,” Waki Gubenur geupeugah lom saboh peuneugah nyang raya that makna jih.
Tamsé nyan meusigrak geusambôt lé Waki Bupati Aceh Timu, T. Zainal Abidin, watèe nyan purumoh geuh na di sampéng ka deungön teuanggôk ta’zém. Deungön su geuh nyang teunang gob nyan T. Zainal Abidin nyan geutamah tamsé nakeuh pu nyang ka neupeusampoe lé Waki Gubernur Acèh nyan nakeuh saboh ceureumen kaca njang ata nyan dali jih nyan jeulah ateueh reuncana peugöt – seumeugöt nanggroe.
“Kamoe di Aceh Timu nyoe donya akhirat ka siap bantu meumbantu. Kareuna kamoe inoe nyakin meuh ateuh keurija ban mandum ureueng lam peumerintahan meusampoe ngön masyarakat. Kamoe harök Aceh Timu nyoe beuteudöng lagèe teupula ngön meumartabat, nakeuh saboh keubanggaan bagi rakyat,” geupeutrang lé Waki Bupati T. Zainal Abidin.
Toe ureueng nyan dua geuh kön alakada saboh alamat, nakeuh bukti njang jeulah bahwa keupeumimpinan nyan lahé dari tapeusaboh droe, bukön keuh ata nyan, nyan saboh acara tandéng – meutandéng. Ureueng nyan dua geuh geupelemah bak geutanyoe mandum nakeuh di ateueh mandum jabatan dengön peuneuduk nyan, na nilai nyang jiôh leubèh lambông nakeuh rasa saléng peucaya, saban sakri ka dengön sayang teuh keu ban mandum rakyat.
Hubungan göt antara Waki Gubenur Fadhlullah ngön Waki Bupati Zainal Abidin nakeuh saboh gamba nyang meuleumpah na ceudah ateuh pakiban njang seubetoi jih Peumimpin meusikeuep, hana manyang até teuhah lagèe na laju ngön galak geuh ateueh keumajuan saban-saban.
Mandua geuh nyan bak tamsé dua boh mata ie nyang ilé u dalam krueng raya nyang geupenan krueng nyan peungabdian. Dua ureueng nyan geuteupue bahwa dalam hai ubah muka Aceh ngön Aceh Timu nyan pereulèe teunaga mandum ureueng bukön tok peumeurintah, nakeuh keu mandum masyarakat nyang galak geutém meuabéh-abéh cinta geuh keu tanoh ie Indatu, keu tanoh lahé geuh.
Nibak uroe nyan, lam angèn pôt di Aceh Timu dua droe Peumimpin njang teungöh jak meujandréng nyan bukön alakada geujak meujandréng nakeuh teungöh geutuléh sijarah ubuet lam hai meurakan, meusaboh droe ka deungön seumangat nyang lambông ateuh hai peugöt seumeugöt Aceh mangat leubèh meusyeuhu.[]
Laporan: Maimunzir
Basa Acèh: Syukri Isa Bluka Teubai
Èditor: Thayeb Lôh Angèn.