ACÈH TIMU – Di ateueh langèt Po Peumerintahan Acèh Timu reudôk meuhalak, awan itam nyan hana meubacut pih meugrak, bak lagèe ujeuen han meuiseuk meusigra rhet keunoe u bumoe.
Bahpih meunan lapangan upacara teutap mantöng ramèe meuretôh droe awak pramuka kadeungen seumangat njang meuapui-apui, awak nyan trôh jih dari meubagoe arah ubé na luah Acèh Timu.
Awak nyan teuka jih keunan nakeuh jikeunak ikôt peumbukaan Jambore cabeueng Aceh Timu meusige ngön uro peuingat Uroe Pramuka Njang Keu-64 Thôn 2025, saboh acara nyang meugahna.
I dalam jih dum nilai peudidékan, disiplin kadeungön meusaban sakri, acara nyan meuteumpat jih nibak Lapangan Upacara Po Peumerintahan Aceh Timu nyan, Sabtu 22 nibak uroe Bulen November thôn 2025.
Lam suasana hana ban meukri ka deungön udara jih njang ka meubèe tanoh bulut, Waki Bupati Aceh Timu nyan T. Zainal Abidin, S.pd.I., M.H, deungön geupeungön lé purumoh geuh nyang meulempah that na geusayaang Ny. Erni Handayani, S.Kep,, geumeulangkah meujandréng u ateueh panggông muliya.
Nakeuh acara neubuka laju sigra meualamat nyan acara ka jeuet peuyata lam buet ka sah kareuna ka lheh geubuka langsông lé droegeuh Waki Bupati. Ban mandum seureta awak ikôt acara ka teubaréh ka deungön aréh meutamah ngön garang horeumat meuprèh-prèh acara teubuka.
Hana trep watèe ujeuen dari langèt rhet meubura raya, meusinthop ateueh tanoh nyang hana bubông, rhet ateuh baho’ ureueng ikôt acara, teu ujoe sidroe-droe ateuh seumangat raya.
Padum-padum droe jamèe ka mulayi kureueng teunang, geukalön wie uneuen, aneuk miet pramuka pih ladôm jingieng u langèt, lam hai nyan hana ureueng nyang meuhalôh-halah.
Ureueng sangka Waki Bupati T. Zainal Abidin geupeusiblah droe u miyup bubông panggông acara, nakeuh gob nyan meutamah geutren geujak lam baréh aneuk miet pramuka nyang teungöh ikôt upacara uroe nyan.
Teuglöng teudöng gobnyan geudöng meujandréng sajan aneuk miet nyan lagèe teupula bahpih ujeuen meutamah meubura. Inan deuh bukönkeuh nyan simata langkah tubôh nakeuh nyan langkah lam até sidroe Pang Ulèe njang tém meusaban saré deungön rakyat nyang meulempah na neusayang.
Geupengön lé purumoh mandua ureueng nyan ridha geuh bulut meusyuk-syuk lam ujeuen raya teutap geupimpin acara ngön seumangat baja. Bajèe dinaih gobnyan ka ujeuen rhah, muka gob nyan kajirhah le ujeuen, leupi meuhingga lam tuleueng.
Beuthat pih ka meunan gobnyan hana gôgah sagai geudöng lam ujeuen nibak watèe nyan, bibi teuseuhèh teukhém meumakna ikeulah dari até geuh lahé nyata deuh u luwa.
Peusereuta acara kureueng leubèh na sangkira 500 droe ban geukalön Waki Bupati Aceh Timu dumnan seumangat geuh, geutém meubulut lam ujeuen raya, maka ban mandum ureueng nyan geuprôk-prôk jaroe meuseuniya.
Meutabék horeumat ateuh tames nyang ka geupeulahé lè sidroe pang ulèe nyang tém meusabé nyang tém meusaré deungön rakyat geuh lam hai seunang meunan sit lam hai sôsah. Saban bulut lam ujeuen raya.
Bhah acara nyan tamsé keuh alamat, nyoe keuh pang ulèe bukön tamsé pang ulèe nyang tok geumeyuue rakyat, tapi nakeuh droneuh nyan pih neupubuet buet lagèe haba. Nyoekeuh peutuha pramuka Aceh Timu bukön tok geupeuseumangat nakeuh, gob nyan geutém meubulut sit, bah pih lam tuleueng ka leupie meuwab ujeuen raya.
Lam peunegahgeuh Waki’ Bupati Aceh Timu nyan T. Zainal Abidin deungön purumohgeuh mantöng sit geupeungön gobnyan hinan lam ujeuen raya nyan.
Upacara peuhah Jambore Aceh Timu thon 2025 nyoe, bahpih lam ujeuen raya nakeuh, tamsé alam nyoe jipeutrang sabôh alamat keu geutanyoe ban mandum kibankeuh geutanyoe nyoe suwa beutameusifeuet, beutameubuet lagèe na meunyoe memang, meunan keuh peungabdian geutanyoe nyoe pukeuh ateuh rakyat meunan sit keu adoe-adoe pramuka nyoe.
“Nyoe keuh tugaih geutanyoe, tameusaban saré deungön saléng tameusyara. Sôsah ka deungön seunang tapeujak beumeujandréng. Meunyoe ujeun bah bulut teuh saban-saban. Menyoe uroe seuuem geutanyoe pih meunan, meunyoe pih lam seunang tanikmati beusaban,” kheun Waki Bupati T. Zainal Abidin lam ujeuen raya teungôh rhah dônya.
‘Oh lheuh upacara, teupiké lé geutanyoe Waki Bupati geujak gantoe bajèe atawa geujak peuthô badan geuh. Nakeuh di Waki Bupati nyan ngön purumohgeuh Ny, Erni Handayani geutren u miyub panggông geujak kalön saboh-saboh kèmah pramuka.
Bajèe geuh mantöng meutèp-tèp ie, lako ngön binoe nyan geujak paréksa kiban peunajôh aneuk miet pramuka, teumpat éh meusampé neujak kalön teumpat peulayanan keusèhatan nyang ka meutempat inan nibak acara raya nyan, teumpat nyan ata Kanto Dinah Keusèhatan Aceh Timu.
Hana deuh hèk meubacut pih nibak ruman muka geuh, meunan keuh ban tulôh deungen peuduli keu adoe-adoe nyang teungöh ikôt acara pramuka nyan mulayi tanggai 21-26 November 2025.
“Ceubeueh, jeumöt, meuagama dengön pako’e.” Nyan teuma acara meuseureta dengön tamsé seumangat lam pramuka “Satyaku Kudarmakan, Darmaku Kubaktikan.”
Ujeuen raya hana jeuet keu peungarôh seumangat mandum seureuta. Ban mandum inan teuglöng lagée teupula watèe lagu Indonesia Raya, Himne Aceh ka deungön Himne Pramuka jimeuseuraya.
Bahpih tubôh leupi teurasa Waki Bupati T. Zainal Abidin mantöng ngön binogeuh, meutamah lom sinan Keupala Dinah Kanto Peundidékan Aceh Timu Bustami, S.pd., M.Si peutuha panitia deungön peutuha Carateker Kwarcab Aceh Timu Teuku Saiful Anwar.
Ureueng nyan mandum geutabék horeumat inan, hana geupakoe ujeuen raya rhah badan, ureueng nyan geudöng teuglöng meusaboh langkah hana teuatrèt u liket. Lam hai nyan keuh saré ureueng nyang na bak acara nyan geusampôh-sampôh mata, tanda ie mata ka jilé u luwa. Meunan keuh tamsé nyata ateuh teuladan njang ka geupelahé lé peureuté peutuwa.
Lam keugiatan njang punoh makna nyan, na geuteuka sit Asisten I Setdakab Aceh Timu Syafrizal Fauzi, S.STP., M.Si, Keupala Dinah Peurikanan Syarifuddin, SP., M.Si, Keupala Dinah Bappeda Aceh Timu, Dandim 0104/Atim meuwakilah ateuh Danramil 06/Dam Kapten Cba M. Yusuf.
Meunan sit deungön Kapolreh Aceh Timu meuwakilah ateuh Wakapolreh Kompol Abdul Muin, S.H., M.M, Kajari Aceh Timu meuwakilah ateuh Fungsional Pranata Humas Kejaksaan Negeri Aceh Timu Sudirman, S.H
Meunan sit ka deungön mandum peungurôh Kwartir Cabang Pramuka Aceh Timu, trôk teuka sit keunan Kapolsek Idi Rayeuk, Danramil Idi Rayeuk, meuseureta ngön ban mandum jamèe teuundang meungieng kalön langsông di keue mata watèe nyang meuleumpah that na jroh nyan.
Jamboré nibak thôn nyoe bukönkeuh keu ala kada keugiatan thôn. Nakeuh sikeuep nyang ka geupeulahé lé Waki Bupati Aceh Timu T. Zainal Abidin nyan jeuetkeuh keu saboh hikayat calitra lam hai meusaboh droe, lam hai peutuwa nyang kön simata döng peugah-peugah haba tok di ateuh panggông acara.
Nakeuh, langsông geutren seureta saban bulut bajèe lam ujeuen raya. Meunankeuh seuaréh-aréh cara nyata tapeulahé ukeu geunerasi muda di bansa, bahwa peungabdian nyoe geutanyoe nyoe beubeuhe beusaban sare adak pakiban ban kri geutanyoe beusare meujandréng.
Nibak beungöh uroe nyoe di Aceh Timu lam ujeuen raya calitra ubeuet nyang meulambông makna ka lheuh teutuléh. Calitra bhah peumimpin nyang ridha tém meubulut keu meusaboh droe. Calitra bhah atèe nyang adé bukönkeuh keu ala kada saboh jabatan. []
Laporan: Maimunzir
Basa Acèh: Syukri Isa Bluka Teubai
Èditor: Thayeb Lôh Angèn.