BerandaInspirasiSastra Sambot Thon Baro 2020

[BASA ACEH] Sambot Thon Baro 2020

Populer

Sambot thon baro bek that guransang
Beulanda pasang kon pusaka Ja
Atra geutanyoe chit thon Iseulam
Meutapi sayang semarak hana

Sambot thon baro ingat beulakang
Sithon ka leukang peue na seumpeuna
Dalam hudep droe na kemajuan
Atawa cittan rugoe le nyang na

Dalam thon baro tapeuget program
Beusimban rakan ngon cita – cita
Meunyo  baroekon hantom seumayang
Udep lam ong-ang  dan meudiwana

Mulai thon nyoe beudoh tariwang
Tapujoe Tuhan Allah Ta’ala
Keubuet hareukat meunan cit taulan
Bekle muwayang dale meudoda

Lale keumawe dawok peh rantam
Uroe ngen malam lam meudiwana
Nyan oek diulee layee sikhan-khan
Mise nyang hitam meu-ubah warna

Tanda ka tuha geutanyoe rakan
Tinggai tapreh jan tatinggai donya
Digop dak geuduek gabhuek peh rantam
Pasang pikeran beulanja pih na

Ditanyoe lheueh hek capek peh rantam
Ie kupi sikhan yue tuleh teuma
Meunyo  bit galak apak meurantam
Anggoeta Dewan calon droe beuna

Sinan dialog konle peh rantam
Kameu ubah nan tanda mulia
Konle cang panah peugah kri nyang ban
Walau  barosan “meudawa”  pihna

Pemilu ukeue beuna lam rancang
Anggota Dewan  beuna reuncana
Beuna   calon droe Anggota Dewan
Modal peh rantam bak droe cit kana

Tinggai ta asah beupah pikeran
Sikula bak MAN  ijazah pih na
Tamong ret Parnas; Partai Lokal
Meunyo  le pangkai rijang meunama

Tamong kompanye nyangnye terantam
Nyang ek tajalan ‘ohmat kuwasa
Bek tabu janji puteh jeuet itam
Han ek tajalan nan tipu daya

Bekle tatipee rakyat nyang awam
Lagee tapadan yue pileh gata
Untong get nasib neubrile Tuhan
Duek muto sidan ‘oh pangkat raya

Rumoh pih lagak ramphak hana ban
Anggota Dewan anggaran cit na
Bek takeureuleng pakhok  bak jalan
Tapeupo ligan muto bak gata

Dikamoe rakyat cara berjuang
Anggota Dewan nyang na seutia
Senang pih sare singke pih sajan
Kon nyang peutimang troe pruet droe saja

Meumada ‘ohnoe saboh peusanan
Keu awak  Dewan thon baro teuka
Thon  2020  mudah-mudahan
Beudalam aman dame sijahtra.[]

Bale Tambeh, 2 Januari 2020 poh 15.15

T.A. Sakti, peminat sastra Aceh.

TINGGALKAN KOMENTAR

Silakan masukkan komentar anda!
Silakan masukkan nama Anda di sini

Berita terkait

Berita lainya